मंकाः धुकूया न्हापांगु साधारण सभा
येँ (सन्ध्या टाइम्स)/ मंकाः धुकू बचत तथा ऋण सहकारी संस्था लिमिटेडया न्हापांगु साधारण सभा म्हिगः थनया तलेजु पार्टी पालेसय् क्वचाल ।
नायः रमेशकाजी स्थापितं सभाया सभापतित्वया आसन ग्रहण यासें न्ह्याःगु सभाय् वय्कलं संस्थाया प्रगति विवरण न्ह्यब्वयेगु नाप मंकाः धुकूपाखें लिपा याना वनेगु थीथी ज्याझ्वःया नं जानकारी बियादीगु खःसा लेखा परीक्षक नियुक्ति व पारिश्रमिक सम्बन्धि वय्कलं तयादीगु प्रस्तावयात सर्वसम्मतिं पारित यायेगु ज्या जूगु खः ।
उपाध्यक्ष शरद कसाः 'कसाः छेँ'या लसकुस न्वचुपाखें न्ह्याःगु ज्याझ्वलय् वय्कलं मंकाः धुकू बचत तथा ऋण सहकारी संस्थापाखें संचालन याना वयाच्वंगु थीथी सुविधाया लिसें खाता संचालन व त्यासा प्रवाहया बारे नं जानकारी बियादीगु खःसा सभाय् येँ डिभिजन सहकारीया प्रतिनिधि कृष्णप्रसाद शर्मां सहकारी धइगु सामाजिक उत्तरदायित्व कुबियाः सहकार्य याना वनेगु छगू संस्था जूगुलिं सामाजिक ज्याय् ग्वाहालि जुइकथंया थीथी ज्याझ्वःत याना वनेगु सुझाव बीगुया लिसें थुगु सहकारीयात थुकिया दुजःपिं सकसिनं थःगु भाःपीमाःगु खँ कनादिल। लिसें सहकारी संस्थां नं लगनशील, इमान्दारी व पारदर्शिता स्वता खँयात विशेष रुपं ध्यानय् तयाः वन धाःसा उकिं छगू कथंया सफलता चूलाके फइगु विश्वास प्वंकादिल ।
सहकारी संस्थापाखें त्यासा वा गुगु नं कथंया सुविधा कायेत दकलय् न्हापां सहकारी संस्थाया दुजः अनिवार्य रुपं जुइमाःगुलिं सहकारी संस्था नं दुजः ल्याः अप्वयेकेमाःगु वय्कलं कनादिल ।
लेखा समितिया प्रतिवेदन नं ब्वनाः न्यंकूगु उगु सभाय् कार्यकारी प्रमुख अधिकृत अमेश वज्राचार्यं मंकाः धुकूया थौंतकया स्थितियात कयाः जानकारी बियादीगु खः।
उगु हे सभाय् मंकाः धुकूया शेयरधनीतय्त शेयर प्रमाण-पत्र लःल्हायेगु नं ज्या जूगु खः ।
