संयन्त्रय् प्रधानमन्त्री आवश्य मदु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' उच्चस्तरीय राजनीतिक संयन्त्रय् प्रधानमन्त्रीया आवश्यक्ता मदुगु खँ धयादीगु दु ।
धनगढीलय् मंगलवाः पत्रकारत नाप खँल्हानादिसें माओवादी अध्यक्ष प्रचण्डं आःया राजनीतिक गतिरोध वर्तमान सरकारया हे कारणं वःगुलिं प्रधानमन्त्रीयात संयन्त्रय् दुथ्याके आवश्यक मजूगु धयादिल । वयेकलं धयादिल - 'सुया कारणं गतिरोध ब्वलंगु खः वयात हे वयात हे दुथ्याकूसाः निकास पिहांवइमखु ।'
राजनीतिक संयन्त्र सरकार परिर्वतनया निंतिं मजूगु धयादिसें वयेकलं राजनीतिक संयन्त्र पाखें सरकार ग्याय् म्वाःगु धयादिल । आःया गतिरोध अन्त्य जुइमबीगु व इलय् हे संविधान निर्माण नापं शान्ति प्रकृयायात निष्कर्षय् थ्यंके चाहेमजूपिंसं संयन्त्रया बारे टिकाटिप्पणी यानाच्वंगु द्वपं बियादिल ।
वयेकलं माओवादीं गुकथं झिदँया जनयुद्ध यानाः संविधानसभाया माग पूवंका त्वःतल अथेहे राष्ट्रिय स्वाधिनताया मुद्दा नं त्याकाः हे त्वःतेगु दावी यानादिल । वयेकलं राष्ट्रिय स्वाधिनताया मुद्दायात राजनीतिक ल्वाभःया रुपय् माओवादीं छ्यःगु धकाः दुष्प्रचार याःगु प्रति आक्रोश प्वंकादिल ।
