संयन्त्रं गतिरोध अन्त्य यायेफइमखु : ओली
नेकपा (एमाले)या नेता केपी शर्मा ओलीं पर्याप्त सहलह बिनाः गठन याःगु उच्चस्तरीय राजनीतिक संयन्त्रं जारी राजनीतिक गतिरोधया अन्त्य यायेमफइगु दाबी यानादीगु दु ।
एमालेया पाँचथर जिल्ला अधिवेशनया निंतिं मंगलवाः सुथय् इलाम थ्यंकादीम्ह ओलीं पत्रकारत नाप खँल्हाबंला यानादिसें दलत दथुइ हे पर्याप्त बहस मजुइकं गठन जूगु संयन्त्र दलया मजूसें व्यत्तिगत जूगु द्वपं बियादिल । वयेकलं संयन्त्रया क्षेत्राधिकार, कार्यअधिकार, समयावधि छुं नं प्रस्ट मजूगु धयादिसें संयन्त्रयात ज्या यायेफइगु कथं गठन यायेमाः धयादिल ।
वयेकलं माओवादीया आन्दोलन कला बिनाया नाटक जूगु धयादिसें माओवादीया व्यवहार मस्तय् थें जूगु धयादिल । अथेहे निर्धारित इलय् संविधान निर्माण जुइगु धयादिसें नेता ओलीं संविधान संशोधन स्वयां न्हूगु संविधान निर्माण यायेगु ज्याय् लगेजुइमाः धयादिल ।
अथेहे मेगू छगू प्रशंगय् वयेकलं एमाले दुने गुट उपगुट मजूगु दावी यानादिल । वयेकलं एमाले लोकतान्त्रिक पार्टी जूगुलिं वहे कथं अभ्यास जक जूगु धयादिल ।
