माओवादी महासचिवयात खुर्दलोटन बाँध निरीक्षणय् भारतीय रोक
प्यंगूगु चरणया आन्दोलन अन्तर्गत सीमा क्षेत्रया अवलोकन यायेत रुपन्देहीया खुर्दलोटन थ्यंकादीम्ह एनेकपा (माओवादी)या महासचिव रामबहादुर थापा बादल सहितया पुचःयात भारतीय सीमा सुरक्षा बल एसएसबीं उगु क्षेत्रया निरीक्षण यायेत रोक लगेयाःगु दु ।
मंगलवाः सथुय् अन वंगु पुचःयात एसएसबीं पनेवं महासचिव बादल सहितया पुचः नेपाली भूमि पाखें हे खुर्दलोटन बाँधया अवलोकन यानाः लिहांझाःगु खः । बाँध निरीक्षणया निंतिं बादल सहितया पुचः अन थ्यंगु जानकारी दयेवं बाँध क्षेत्र व नेपाः-भारत दथुइया दश गजा क्षेत्रय् व्यापक रुपय् भारतीय सुरक्षाकर्मी तैनाथ याःगु खः ।
भारतीय सुरक्षाकर्मीतय्सं समाचार संकलनया निंतिं अन थ्यंकूपिं संचारकर्मीतय्त नं दुर्व्यवहार याःगु दु । बाँध निरीक्षण लिपाः संचारकर्मीत नाप खँल्हानादिसें बादलं भारत नाप जूगु असमान सन्धि, सम्झौता खारेज मजूतल्ले आन्दोलन जारी जुइगु कनादिल ।
