राष्ट्रिय न्हिपौया बुखँ प्रति नेवाःत आक्रोशित
जाति व भाषाया सवालय् बुखँत बीत नुगः क्येकूंकीगु राष्ट्रिय न्हिपौ पाखें थुसी छक्वः हानं नेवाःतय् बुँखयात ब्यक्वयेकाः भ्रम सिर्जना याइगु कथं बुखँ पिथंगुलिं नेवाःत आक्रोशित जूगु दु ।
राष्ट्रिय जनमोर्चा पाखें आइतवाः संघीयताया विरोध यासें याःगु बागमती अञ्चल नापं स्वनिगः बन्दया प्रतिकार नेवाः स्वयात्त राज्य जन जागरण अभियानया आह्वानय् स्थानीय नेवाःतय्सं हे याःगु ज्याझ्वःयात माओवादीं प्रतिकार याकूगु धइगु भ्रमपूर्ण बुखँ प्रेषित यानाः प्रतिकार ज्याझ्वःयात राजनीतिकरण यायेत स्वःगु धासें नेवाःतय्सं तँ प्वंकूगु दु ।
नेवाःतय्सं थंज्याःगु न्हिपौ पाखें प्राय रुपं जाति व भाषाया सवालय् बुखँत बीहे मबीगु व ब्यूसा: थुकथं भ्रम ब्वलंनीगु कथं बुखँ बीगु धासें आक्रोश प्वंकूगु खः ।
लुम्केबहजू, सोमवाः संघीयताया विरोध यासें या:गु बन्दयात नेवाः स्वायत्त राज्य जन जागरण अभियानं नेवाः स्वयात्त राज्यया ध्वाँय् सहित स्वनिगःया थीथी थासं मोटरसाइकल र्याली पिकयाः बन्दया प्रतिकार याःगु खः ।
