प्रचण्डया धापू प्रति प्रधानमन्त्री नेपालया आपत्ति
प्रधानमन्त्री माधवकुमार नेपालं एनेकपा (माओवादी) अध्यक्ष पुष्पकमल दाहाल 'प्रचण्डं' जननेता मदन भण्डारी सीगु प्रसंगयात थःगु राजनीनित स्वार्थ नाप स्वाःगु धासें आपत्ति प्वंकादीगु दु । वयेकलं प्रचण्डया दुस्प्रचार प्रति थःगु गम्भीर ध्यानाकर्षण जूगु खँ नं धयादीगु दु ।
प्रधानमन्त्रीया सचिवालय पाखें प्रेस सल्लाहकार विष्णु रिजालं सोमवाः छगू प्रेस वक्तव्य पिथसें प्रधानमन्त्री माधवकुमार नेपालया नां उद्यृत यासें 'अमेरिका व भारतं नापलाये धाःगु इलय् तप्यंक फुर्सत मदु धइपिनि ताल थथेहे जुइ' धकाः प्रचण्डं ब्यूगु अभिव्यक्ति तसकं आपत्तिजनक, घृणित व गोरजिम्मावर जूगु खँ न्ह्यथंनातःगु दु ।
वक्तव्यय् देय्या प्रधानमन्त्री जुइधुंकूम्ह मनूखं थंज्याःगु निराधार कपोलकल्पित व भ्रम सिर्जना याइगु कथंया अभिव्यक्ति वइगु धइगु प्रचण्ड स्वयमया राजनीतिक हैसियत व विश्वासनीयताय् न्ह्यसः थंगु खँ नं धयातःगु दु ।
अथेहे राजनीतिक रुपय् दुगु मतभेदया सम्बन्धय् राजनीतिक रुपं हे बहस व वादविवाद यायेगुया पलेसाः व्यक्तिगत चरित्रहत्या यायेगु ज्या खेदजनक जूगुलिं थंज्याःगु प्रवृत्ति त्वःताः राजनीतिक संस्कार अवलम्बन यायेत नं वत्तव्यय् धयातःगु दु ।
माओवादी अध्यक्ष प्रचण्डं वंगु शनिवाः येँ जूगु छगू ज्याझ्वलय् मदन भण्डारी नाप राष्ट्रियताया विषयलय् सहलह जुइत्यंगु इलय् हत्या जूगु खँ धयादीगु खः ।
