कानून उलंघन याइपिंत त्वःतेमखु : गृहमन्त्री
गृहमन्त्री भीम रावलं कानून उलंघन याइपिं न्ह्याम्ह जुसां मत्वःतेगु प्रतिवद्धता हानं छक्व प्वंकादीगु दु ।
व्यवस्थापिका संसदया सोमवाःया बैठकय् विशेष ई कयाः न्ववानादिसें रावलं विद्यमान कानून व अन्तरिम संविधान कथं न्ह्याःगु कथंया दोषियात कारवाही यायेत नं सरकार प्रतिवद्ध जूगु धयादिल । वयेकलं सरकार कानूनी राज्य स्थापना यायेगु प्रति इमान्दार जूगु धयादिसें दिगो शान्ति कायम यायेत सुरक्षा निकाययात थप सुदृढ यायेगु धयादिल ।
पर्साया सहायक प्रमुख जिल्ला अधिकारी बलबहादुर मल्लयात सोमवाः सुथय् गोली प्रहार याःगु व वयेकया अंगरक्षक अनन्तराज खड्का सीगु धासें सभासद्तय्सं लिसः फ्वनेवं गृहमन्त्रीं सुरक्षा सतर्कता थप सुदृढ यायेगु खँ धयादीगु खः ।
अथेहे गृहमन्त्री रावलं माओवादीं थीथी थासय् निजी व सार्वजनिक सम्पति कब्जा याःगु प्रति आपत्ति प्वंकादिसें शान्ति सुरक्षायात मजबुद यायेत कानूनया पालना यायेत माओवादीयात इनाप यानादिल ।
