युरोपेली संघपाखें संयन्त्रया लसकुस
उच्चस्तरीय राजनीतिक संयन्त्रया लसकुस यासें युरोपेली संघं सकारात्मक निकास पिकायेत थ्व ग्वाहालि जुइगु विश्वास प्वंकूगु दु ।
संघया नेपाः स्थित मिसन प्रमुख स्विट्जरल्यान्ड व नर्वें शुक्रवाः पिथंगु विज्ञप्तिइ शान्ति प्रकृयाया प्रमुख मुद्दायात सम्बोधन यानाः सकारात्मक निष्कर्ष पिकायेत स्वंगू प्रमुख दलं गठन याःगु उच्चस्तरीय राजनीतिक संयन्त्रयात लसकुस यायेबह जूगु खँ न्ह्यथंनातःगु दु ।
संघं सन् २०१० नेपाःया निंतिं महत्वपूर्ण दँ जूगु धासें संयन्त्र शान्ति प्रकृयाया निंतिं आपसी विश्वास अभिवृद्धि व सहमति निर्माण यायेत उपयोग यायेमाःगु खँ धाःगु दु । अथेहे संयन्त्र विस्तृत शान्ति सम्झौताया इमान्दार कार्यान्वयन व न्हूगु संविधान निर्माण यायेगु थंज्याःगु आधारभूत प्रतिबद्धता पूवंकेगु ज्याय् ग्वाहालि जुइगु खँ नं धाःगु दु ।
अथेहे विज्ञप्तिइ अयोग्य लडाकूतय् बहिर्गमन प्रकृया लसकुस यायेबह जूगु धासें थ्व ज्या याकनं पूवंकेत नं इनाप याःगु दु ।
