'संयन्त्रं राजनीतिक गतिरोध ज्यंकेगु पर्याप्त आधार मदु'
सत्तारुढ तराई मधेश लोकतान्त्रिक पार्टीं शुक्रवाः गठन जूगु उच्चस्तरीय राजनीतिक संयन्त्रं जारी राजनीतिक गतिरोध ज्यंकेत पर्याप्त आधार मदुगु ठहर याःगु दु ।
सोमवाः निसें शुरु जूगु तमलोपाया केन्द्रीय समितिया बैठकं दलतय्गु थःथःगु अडानं निकास पिहांवयेमफुगु गतिरोध स्वंगू दलया नेतात संयन्त्रय् च्वनेवं समस्या समाधान मजुइगु खँ धाःगु दु । तमलोपां संविधानसभा व उकी अर्न्तगतया विषयगत समितिया भूमिका निस्तेज यायेगु औचित्य व बैधानिकता नं अस्पष्ट जूगु संयन्त्र प्रति पार्टीया सहमति मदुगु खँ स्पष्ट याःगु दु ।
शुक्रवाः कांग्रेस सभापति गिरिजाप्रसाद कोइरालाया संयोजकत्वय् माओवादी अध्यक्ष पुष्पकमल दाहाल 'प्रचण्ड' व एमालेया अध्यक्ष झलनाथ खनाल दुजः दुगु उच्चस्तरीय संयन्त्र गठन जूगु खः । संयन्त्र प्रति प्रधानमन्त्री माधवकुमार नेपाल, एमाले वरिष्ठ नेता केपी शर्मा ओली नापं कांग्रेस व एमालेया नेतातय्सं नं आचोलना यायेधुंकूगु दु ।
