'भारतया इशारां हे संयन्त्र दयेकूगु'

येँ (सन्ध्या टाइम्स)/नेपाल मजदुर किसान पार्टीया नायः नापं सभासद् नारायणमान बिजुक्छें स्वंगू तःधंगु दलया शीर्ष नेतात च्वनाः दयेकूगु उच्चस्तरीय राजनीतिक संयन्त्र अनैतिक गठबन्धन खः धयादीगु दु। थौं सुथय् 'सन्ध्या टाइम्स'लिसे खँ ल्हासें वय्कलं अथे धयादीगु खः ।

वय्कलं एनेकपा (माओवादी), नेपाली कांग्रेस व नेकपा (एमाले) या शीर्ष नेतात जक च्वनाः दयेकूगु उच्चस्तरीय संयन्त्र औचित्यहिन जूगु दावी यासें थःपिं अज्याःगु संयन्त्रय् च्वनेगु जुइ मखु धकाः नं धयादिल। नेता बिजुक्छें सत्तापक्ष व विपक्ष च्वनाः दयेकूगु थ्व गुज्वःगु गठबन्धन खः धकाः न्ह्यसः तसें ततःधंगु दलया नेतातय्सं अप्रजातान्त्रिक कथं अथे संयन्त्र दयेकूगु द्वपं नं बियादिल। कांग्रेस, एमाले व माओवादीया नेतातय्सं हे उगु संयन्त्रयात विरोध यानाच्वंगुलिं थ्व स्वंगू पार्टीइ तकं निर्णय यानाः थ्व संयन्त्र दयेकूगु मखु धइगु स्पष्ट जूगु दावी नं वय्कलं यानादिल।
आःया अवस्थाय् हिन्दुस्तानं नेतातय्त म्हितकाच्वंगु दु धासें वय्कलं थ्व उच्चस्तरीय संयन्त्र नं भारतया हे इशाराय् नेपाःया नेतात न्ह्याः वनाच्वंगुया मेगु दसु खः धयादिल।
लुमंकेबहःजू राजनीतिक गतिरोध अन्त्यया निंतिं वंगु शुक्रवाः नेकां सभापति गिरिजाप्रसाद कोइरालाया नेतृत्वय् एनेकपा (माओवादी) पाखें पार्टी अध्यक्ष प्रचण्ड व एमालेया अध्यक्ष झलनाथ खनाल दुजः कथं च्वनाः उगु संयन्त्र दयेकूगु खः ।