संघीयता विरोधीतय्त लितुमतु लीगु
येँ (सन्ध्या टाइम्स)/संघीय गणतन्त्र नेपाः दुने थाय्थासय् संघीयताया विरोधय् न्हापांनिसें आः तक नं भूमिगत जुयाच्वंगु मोहनविक्रम सिंहया नेतृत्वय् दुगु नेकपा (मसाल) या चुनावी मोर्चा राष्ट्रिय जनमोर्चां बन्द याना वयाच्वंगु झ्वलय् म्हिगः स्वनिगः बन्दयात नेवाः स्वायत्त राज्य पक्षधर नेवाःतय्सं याःगु प्रतिकारपाखें उत्साहित जुयाः आः मेमेगु लागा बन्द याः वइबलय् अन नं स्थानीय जनजातितय्सं थथे हे प्रतिकार यायेगु तयारी शुरु जूगु दु।
संविधानसभाय् प्यम्ह सभासद् दुगु चित्रबहादुर केसी नेतृत्वया राष्ट्रिय जनमोर्चाया घोषित ज्याझ्वः कथं संघीयता विरुद्ध आः पुस २९ गते पूर्वाञ्चल बन्द यायेत्यंगु दुसा अबलय् बन्द याःवल धाःसा अनया लिम्बुवान व खम्बुवान आदिवासी जनजातितय्सं प्रतिकार यायेगु तयारी यानाच्वंगु खँ सीदुगु दु ।
राष्ट्रिय जनमोर्चां संघीयताया विरोधय् थ्वहे वइगु माघ ६ गते राप्ती व लुम्बिनी अञ्चल बन्दया घोषणा यानातःगु दु ।
