छत्रपाटी चिकित्सालयय् हानं विजय माली
येँ (सन्ध्या टाइम्स)/येँया १७ वडाय् च्वंगु नांजाःगु छत्रपाटी निःशुल्क चिकित्सालयया अध्यक्ष पदय् हानं छक्वः भाजु विजयबहादुर मालीयात हे निर्विरोध ल्यःगु दु। वय्कः चिकित्सालयया वर्तमान नायः नं खः ।
न्हूधाः कथं न्वकु पदय् शंकर राज जोशी वःगु दुसा मूछ्यांज्ये जलकृष्ण श्रेष्ठ, छ्यांज्ये प्रेमदास ताम्राकार, दांभरि दिनकरमानसिंह प्रधान व लिउ दांभरि योगेन्द्रमान श्रेष्ठपिं वःगु दु ।
अथे हे दुजलय् कपिल श्रेष्ठ, हरिओम महर्जन, कुमार देव मानन्धर, नविन मानन्धर व विप्लवमान सिंह ल्यःगु दु। २९५ म्ह मतदाता दुगुली २१९ म्हेस्यां सदस्य पदया लागिं मतदान याःगु खः। प्यंगु भोट रद्द जूगु खः ।
उकी पुलांम्ह सांसद लक्ष्मीदास मानन्धर, ईश्वरलाल श्रेष्ठ व दिवाकर विक्रम राणापिं निर्णायक मण्डलय् च्वनादीगु खः।
२०१३ सालय् सामान्य वासः यायेगु थासं शुरु जूगु थुगु चिकित्सालयं आः आपालं सुविधा दुगु अस्पतालया रुप कायेधुंकूगु दु ।
