डोल्पाया अवतारी लामापाखें उपचार
यल (सन्ध्या टाइम्स)/डोल्पाया अवतारी लामा गुरु रिन्छेन रिम्पोक्षं थीथी ल्वचं कयाच्वंपिं यलया सलंसः मनूतय् ल्वय् वासः हे नये म्वायेक लंका बिउगु दु। वंगु पुस १० निसें १२ गते तक थनया युवक बौद्ध मण्डल, नेपाल व ललितपुर बुद्ध जयन्ती कोषया मंकाः ग्वसालय् वय्कःपाखें उपचार याकेगु शिविर सञ्चालन याःगु खः। उगु शिविरय् छ्यं, छाती, जँ, ल्हाः, तुति, प्वाः स्याःपिं, पिनास, पित्त, वायु आदिया विकार दुपिं करिब ३५० म्ह ल्वगितय्त लामा गुरु रिम्पोक्षं वासः नये म्वायेक लंका बिउगु खः ।
ज्याझ्वःया समापन कुन्हु युवक बौद्ध मण्डलया नायः हेरारत्न शाक्यं उपचारया लागिं लामा गुरुयात सुभाय् देछानादिलसा बुद्ध जयन्ती कोषया नायः धर्मबहादुर शाक्यं वय्कःयात सुभाय्पौ लःल्हानादिल ।
उखे मलेशियाय् डब्लुएफबीवाई या क्षेत्रीय केन्द्र वाईबीएएमपाखें याःगु एशियन बौद्ध युवा प्रशिक्षण गोष्ठीइ ब्वति कायेत वाईएमबीए क्लब २५ या नायः विनिसा शाक्यया नेतृत्वय् न्याम्ह दुजःपिं उखेपाखे वंगु दु। गोष्ठी १५ न्हुया जुइ ।
उकथं हे युवक बौद्ध मण्डलया महासचिव बुद्धरत्न शाक्यया नेतृत्वय् ३२ म्ह मनूतय् छगू पुचः बौद्ध चार धाम यात्राय् प्रस्थान जूगु दु। लुम्बिनीं शुरु जुइगु उगु यात्रा झिंनिन्हु ताःहाकः जुइगु खँ धाःगु दु ।
