नेप्से हाकनं कुहां वन
येँ (सन्ध्या टाइम्स)/नेपाल स्टक एक्सचेन्जय् थ्व वाःया न्हापांगु न्हिया शेयर कारोबारय् नं बजार परिसुचकया लिसें दांया कारोबार नं कुहां वःगु। बजार परिसुचकया लिसें दक्वं समुहया कारोबार नं कुहां वःगु दु। स्टक एक्सचेन्जया कथं थ्व कुन्हु बजार परिसुचक नेप्से शुन्य दशमलव ४ या सामान्य अंकं कुहां वःगु दु। सेन्सेटिभ शुन्य दशमलव शुन्य ४ अंकं कुहां वःगु दु। कुहां वःगु समुहगत कारोबारय् फ्लोट शुन्य दशमलव शुन्य ८ अंकं कुहां वल ।
स्टक एक्सचेन्य् बजाः चालेवं छुं ईया निंतिं स्थिर जूगु बजार परिसुचक वयां लिपा छक्वलं २ अंक स्वयां अप्वः कुहां वःगु खःसा। थ्वयां लिपा नं सामान्य कुहां वनाच्वंगु नेप्से करीब घौछि लिपा हाकनं थहां वनेगु क्रमं गति काःगु खः। तर थ्व ताः ईतक कायम जुइ मफुसेंलिं हाकनं कुहां वयेगु शुरु जूगु खःसा कारोबारया अन्तपाखे धाःसा सामान्य थहां वंसां उकिं छुं महत्वपुर्ण भूमिका म्हिते मफुत ।
उखे कारोबार जूगु उपसुचकय् विकास बैंक समुहया कारोबार बाहेकं मेगु दक्वं समुहया उपसुचक नं कुहां वंगु दु। नेप्से थहां वनेगुली प्रमुख भूमिका दुगु वाणिज्य बैंक समुहया सुचक शुन्य दशमलव ६९ अंकं कुहां वनाः ५११ दशमलव ६९ अंकय् थ्यन। जलविद्युत समुहया सुचक शुन्य दशमलव ५३ अंकं कुहां वयाः ७८२ दशमलव ७३ अंकय् थ्यंगु दु। फाइनान्स समुह शुन्य दशमलव १९ अंकं कुहां वनाः ५४३ दशमलव १४ अंकय् थ्यंगु दुसा वीमा समुहया सुचक दकलय् अप्वः ३ दशमलव ८१ अंकं कुहां वयेवं ५६९ दशमलव ९९ अंकय् थ्यंगु दु। मेखे विकास बैंकया समुहया छगू जकया उपसुचक १ दशमलव ७६ अंकं थहां वनाः ५९० दशमलव शुन्य ३ अंकय् थ्यंगु दुसा अन्य समुहयापाखे म्हिगः छगू नं कित्ता शेयर कारोबार मजुल ।
छखे बजार परिसुचक निरन्तर रुपं मदिक्क सामान्य अंकं थहां कुहां जुयाच्वंगु दुसा उखे दांया कारोबार धाःसा झन् जक कुहां वयाच्वंगु दु। स्टक एक्सचेन्जया कथं म्हिगः शेयरय् बजारय् पीगुंगू कम्पनीया ख्वीनिद्वः व च्यासः व गुंगू कित्ता शेयर न्याये-मी जुयाः निगू करोड ग्वीनिगू लाख स्वीछद्वः तका दांया कारोबार जुल ।
शेयर कारोबार जूगु कम्पनीमध्ये नीखुगू कम्पनीया शेयर भाः कुहां वंगु दुसा झिंस्वंगू कम्पनीया थहां वंगु दु अथे हे झिगू कम्पनीया शेयर भाः यथावत हे जुल। स्टायण्डर्ड चार्टर्ड बैंकया शेयरय् प्रति कित्ता ३०/- दां कुहां वःगु दुसा लाइफ इन्स्योरेन्सया शेयरय् २६/- तका दां कुहां वल। नविल बैंकया शेयरय् प्रति कित्ता ५६/- तका दां थहां वंगु दु ।
नेपाल दूरसंचार कम्पनीं दकलय अप्वः न्यय्न्यागू लख तका दांया कारोबार याःगु दु। गोर्खा डेभलप बैंकं अप्वः कमे याःगु दुसा लाइफ इन्स्योरेन्स कम्पनीं द्यापं फःगु दु ।
