विदेशीया न्ह्यने पुलिं चुइमखु : प्रचण्ड
माओवादी शीर्ष नेतात अतिक्रमित सीमा क्षेत्रय्
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' सामन्ती संस्कार व विदेशी भावना दुगु पार्टीं ताः ई तक देशय् शासन याःगुलिं नेपाःया भूमिइ विदेशी हस्तक्षेप अप्वःगु द्वपं बियादीगु दु । वयेकलं आः राष्ट्रिय स्वाधिनतया रक्षाया निंतिं विदेशीतय् न्ह्यने पुलिं मचुइगु खँ धयादिल ।
भारतपाखें सीमा अतिक्रमण याःगु कन्चनपुरया ब्रम्हदेव क्षेत्रया निरीक्षण लिपाः भीमदत्त चूकय् जूगु सभाय् न्ववानादिसें वयेकलं नेपाःया अतिक्रमित सीमा लितकायेत लिपा तक ल्वानाच्वनेत दक्वं देय् दनेमाः धयादिल । वयेकलं सामन्ती शासक व नेतातय्सं नेपाली जनता नाप विश्वासघात व धोक ब्यूगु धयादिसें विदेशी प्रभुया न्ह्यने पुलिं चुइगु विरुद्ध ल्वायेगु जिम्मेवारी नेपालीं जनतां माओवादी पार्टीयात ब्यूगु धयादिल ।
वयेकलं न्हापाःया शासकतय्सं थें विदेशीत नाप पुलिं चुयाः सिंहदरवारय् च्वनेगु परम्परा आ: सह्य मजुइगु धयादिल । वयेकलं जनताप्रति माओवादींया जिम्मेवारी अप्वःगु धयादिसें राष्ट्रियता व राष्ट्रिय स्वाधिनता ल्यंकातयेत माओवादीया उदघोष विदेशी नाप ल्वायेगु व भूमि कब्जा यायेत मखसें राष्ट्रियताय् सुंनां नं कु दुष्टि मतयेमाः धकाः यानाःगु स्पष्ट यानादिल ।
सभाय् ब्रम्हदेवया स्वम्ह स्थानिय बृद्धतय्सं भारतं न्हापानिसें आः तक याःगु सीमा अतिक्रमणया बारे जानकारी ब्यूगु खः ।
सभा न्ह्यः माओवादी अध्यक्ष प्रचण्ड, स्थायी कमिटी दुजः लिलामणी पोखरेल सहित पार्टीया वरिष्ठ नेतातय्सं सोमवाः सुथय् भारं टनकपुर विद्युत परियोजना निर्माण याःगु इलय् हःगु ५७७ मिटरया तटबन्धया निरीक्षण याःगु खः ।
उगु इलय् माओवादी काचनपुर इन्जार्ज देवीदत्त पाण्डेयं लेप्ट एफ्लेक्स वण्ड पिलर नम्बर १ २ व ३या बारे जानकारी बियादीगु खः । नापं उगु पुचलं ब्रम्हदेव निसें टनकपुर क्षेत्रतकया विवादास्पद क्षेत्रया नक्सा क्यनाः ब्रिफिङ याःगु खः ।
अथेहे माओवादीया प्यंगूगु चरणया आन्दोलन कथं माओवादीया वरिष्ठ नेतातय्सं अतिक्रमित सीमा क्षेत्रया निरिक्षण याइगु जूगु दु । निरिक्षण यायेत माओवादी वरिष्ठ उपाध्यक्ष मोहन वैद्य 'किरणं' इलामया पशुपतिनगर व मेम्ह उपाध्यक्ष डा. बाबुराम भट्टराईं नवलपरासीया सुस्ताया थ्यंदीगु दु ।
