पशुपतिइ भारतीयनेतातय् अप्वः चिउताः

नेपाः भ्रमणय् वयाच्वंपिं छुं भारतीय नेतातय्सं थन जुयाच्वंगु पशुपित प्रकरणयात कयाः माक्व स्वयां अप्वः चिउताः प्वंका थकूगु खनेदु । वय्कःपिंसं नेपाः वयाखतं थनया मेमेगु मुद्दाया बारे तकं छुं न्वमवासे न्हापां पशुपतिइ जुयाच्वंगु समस्याय् निं थःपिनि ध्यान बियादीगु खनेदत । पशुपति नेपालय् लाःगु धार्मिकस्थल जूगु कारणं अन जुइगु छुं नं कथंया समस्या नेपाःया आन्तरिक समस्या खः । उकी भारतीय नेतातय्सं हस्तक्षेप यायेभनं चिउताः तयेगु पाय्छि मखु । नेपालं नं आः तक भारतया छुं नं धार्मिकस्थलय् जुइगु समस्या् हस्तक्षेप याः वंगु मदु । भारतय् नं गबलें रामजन्मभूमि गबलें बुद्धया जन्मस्थल गबलें राम सेतु आदि आदि प्रकरणयात कयाः विवाद मजूगु मखु । अज्याःगु छुं नं विवादय् नेपालं प्रतिकि्रया बिउगु मदु । पशुपतिनाथ भारतीयतय् समेत आस्था दुगु धार्मिकस्थल खः । उकिं अन वय्कःपिनि चिन्ता जुइगु स्वाभाविक खः । तर चिन्ता व्यक्त यायेगु तरिका धाःसा हस्तक्षेपया तहलय् वये मजिउ । सम्भवतः भारतीय नेतातय्गु हे दवावया कारणं यानाः पशुपतिया प्रकरण राष्ट्रपितंनिसें कयाः प्रधानमन्त्री प्रमुख प्रतिपक्षी व सतकया समेत चिउताःया विषय जुयाः पिहां वया बिउगु दु । यदि थुकी भारतीय कट्टरपन्थीतय्सं थथे हे हस्तक्षेप याः वल धाःसा थुकिं मेगु रुप काः वनीगु नं खतरा दु । भारतीय कट्टरपन्थीतय्सं हुलदंगा याईपं मनूत हे घुसपैठ याकाः नं थुकियात भयावह रुप बीगु खतरा दु । उकिं नेपालं नं थुकियात फयांफिछ याकनं समाधान यायेगुपाखे पलाः न्ह्याकेमाःगु आवश्यकता दु । मखुसा थुकी विदेशी तत्वं ल्हाः तः वइगु खतरा खने दयावयेधुंकूगु दु ।

More Stories Like this