पर्साया सहायक प्रजिअयात गोली प्रहार, अंगरक्षक सित
पर्साया सहायक प्रजिअ बलबहादुर मल्लयात सोमवाः सुथय् झिताः इलय् वीरगन्जया रानिघाटय् अज्ञात पुचलं अन्धाधुन्ध गोली प्रहार यावलय् वयेकया अंगरक्षक अनन्तबहादुर खड्कका सीगु दु ।
अज्ञात बन्दूकधारीं कयेकूगु निगः गोली अंगरक्षक खड्कायात लागू खसाः वयेक अस्पताल यंकेगु झ्वलय् लँय् हे मदुगु खः । निच्यादँया खड्का सर्लाही कालिजोर ८या स्थायी बासिन्दा खः ।
अथेहे घटनाय् सहायक प्रजिअयात धाःसा गोलीया छर्रा जक लागूलिं वयेक खतरामुक्त जूगु खँ धाःगु दु । घाःपाः जुम्ह मल्लायात नारायणी उपक्षेत्रिय अस्पताया आकस्मिक कक्षय् भर्ना याकूगु दु । वयेकया छयोनय् सामान्य घाः जूगु खँ चिकित्सकतय्सं धाःगु दु ।
वीरगन्ज उप महानगरपालिका १२ रानिघाटय् दुगु जिल्ला प्रशासन ज्याकूया कर्मचारी निवासं ज्याकू वनेगु झ्वलय् सहायक प्रजिअ मल्ल गाडीइ गयेवं गोली प्रहार याःगु खः । घटना जुइवं संयुक्त जनतान्त्रिक तराई मुक्ति मोर्चा पवन पुचया पर्सा जिल्ला ईन्चार्ज सन्दिपं स्थानीय संचारमाध्यमय् फोन यानाः घटनया जिम्मेवारी काःगु दु ।
थुगु घटनाया विरोधय् पर्साया निजामति संगठनतय्सं सोमवाः जिल्लाया दक्वं सरकारी ज्याकूया ज्या बन्द याःगु दु । अनया स्थानीय अस्पतालया आकस्मिक कक्ष व भंसारया ढाट बाहेक दक्वं सेवा तत्कालया निंतिं बन्द यानाः कर्मचारी संगठनतय्सं विरोध प्रदर्शन यानाच्वंगु दु ।
