'विदेशी हस्तक्षेपयात परास्त यायेमाः'
एकीकृत नेकपा (माओवादी)या उपाध्यक्ष नारायाणकाजी श्रेष्ठ 'प्रकाशं' विदेशी हस्तक्षेपयात परास्त मयातल्ले शान्ति प्रकृया निष्कर्ष मथ्यनीगु व न्हूगु संविधान च्वयेमफइगु खँ धयादीगु दु ।
माओवादी पाखें आइतवाः नेपालगञ्जय् ग्वसाःग्वःगु अर्न्तकृया ज्याझ्वलय् न्ववानादिसें वयेकलं शान्ति प्रकृया व संविधान च्वयेत विदेशी हस्तक्षेपयात परास्त यायेमाःगु खँय् बः बियादिल । विदेशीतय् इसाराय् शान्ति प्रकृया भंग व संविधानसभा विघटन यायेगु षड्यन्त्र जुयाच्वंगु नं वयेकलं धयादिल ।
वयेकलं माओवादीं विद्रोह यानाः राज्यसत्ता कब्जा यायेत स्वयाच्वंगु धकाः प्रचार यानाः शान्ति प्रकृयायात स्यंकेत स्वयाच्वंगुलिं थंज्याःगु हस्तक्षेप विरुद्ध संघर्षय् कुहांवःगु दाबी यानादिल । वयेकलं आः शान्तिपूर्ण प्रकृयां माओवादीं राष्ट्रिय स्वाधिनताया रक्षा व क्रान्तिकारी रुपान्तराण यायेगु पक्षय् दुगु नं धयादिल ।
'राष्ट्रिय स्वाधिनता रक्षाया हथ्यात' विषयक अर्न्तक्रिया ज्याझ्वलय् नेता प्रकाशं कांग्रेस व एमालें धाः कथं थःपिं संसदीय मुलधारय् मखसें सामूहिक मुलधारय् वयागु धयादिल । संसदीय मुलधारय् वःगु भ्रम तनेवं भारतीय विस्तारवादीतय्सं मिलेजुया षड्यन्त्र याःगु द्वपं वयेकलं बियादिल ।
