स्वायत्त मधेशया निंतिं आन्दोलन : यादव
मधेशी जनअधिकार फोरमया अध्यक्ष उपेन्द्र यादवं आत्मनिर्णयया अधिकार सहितया स्वायत्त मधेशया स्थापनाया निंतिं हानं मधेश आन्दोलन यायेत्यंगु खँ धयादीगु दु ।
आइतवाः भैरहवाय् फोरमं ग्वसाःग्वःगु क्षेत्रिय आमसभाय् न्ववानादिसें यादवं मधेशी जनतया अधिकारया पक्षय् कांग्रेस, एमाले व माओवादीं स्वंगूलिं राजनीतक दलत अनिच्छुक जूगुलिं नं मेगू मधेश आन्दोलन यायेमाःगु धयादिल ।
वयेकलं सरकार नाप जूगु नीनिगू बुँदे व च्यागू बुँदे सहमतिलय् प्रादेशिक स्वायत्तता व आत्मनिर्णयया अधकार न्ह्यथनातःगु धयादिसें थुकीया विरुद्ध मेमेगू राजनीतिक दलं थःगु अभियान प्रारम्भ याःगु प्रति आपत्ति प्वंकादिसें थुकीया प्रतिवाद यायेत नं मधेश आन्दोलन आवश्यक जूगु बिचाः प्वंकादिल ।
अथेहे वयेकलं संविधान बमोजिम सपथ काःसां उपप्रधानमन्त्री सुजाता कोइरालां संघीयता विरुद्ध न्ववानाः सपथ व संविधानया उल्लंघन याःगु धयादिल । नापं वयेकलं माओवादीं नं थःगु हे कथं गणराज्यत घोषणा याःगु पुलांगु सम्झौतात विपरीत जूगु धयादिसें उगु घोषणा नं मधेशी जनतया पक्षय् मदुगु धयादिल ।
