संघीयताया विरोधीतय्त जनकारवाही घोषणा

येँ (सन्ध्या टाइम्स)/नेपाःया आदिवासी जनजाति, लिउने लानाच्वंगु जाति नापं थीथी समुदायया भावना कथं इलय् हे न्हूगु संविधान निर्माण व जाति, भाषा, क्षेत्रया आधारय् आत्मनिर्णय नापंया स्वायत्तता दुगु स्वशासन सहितया संघीयता सुनिश्चित यायेगु निंतिं पलिस्था यानाः भूमिगत आन्दोलन याना वयाच्वंगु संयुक्त मुक्ति मोर्चां संघीयता विरोधीतय्त जनकारवाही यायेगु घोषणा याःगु दु ।

जाति, भाषा व क्षेत्रया आधारय् राज्यत दयेकाः नेपाःयात संघीय यायेगु मू नारा ज्वनाः भूमिगत कथं आन्दोलन याना वयाच्वंगु उगु मोर्चां निगूगु चरणया संघर्ष कथं 'जनविद्रोह २०६६' धकाः घोषणा यानाः अथे 'जनकारवाही' यायेगु खँ न्ह्यथंगु दु ।

वंगु छुं दिं न्ह्यः जक झापाय् संयुक्त जाति मुक्ति मोर्चा केन्द्रीय समितिया मुँज्या च्वनाः उगु कथं जनकारवाही यायेगु खँ क्वःछिउगु खः। आःया अवस्थाय् संघीयता विरोधी, प्रतिक्रियावादी दलाल, राष्ट्रिय मुक्ति आन्दोलन विरोधी, संघीय लोकतन्त्र व गणतन्त्र विरोधी, विदेशी दलाल, हाकुबंजाःतय्त जन कारवाही यायेगु धकाः खँ क्वःछिउगु खः।
न्हापांगु चरणया आन्दोलनया झ्वलय् संघीयता विरोधीतय्त ख्याच्वः बिउगु उगु मोर्चां न्हापांगु चरणया हे झ्वलय् संघीयताया सवालय् जनमत संग्रह यायेमाः धया वयाच्वंगु राष्ट्रिय प्रजातन्त्र पार्टी नेपाःया ज्याकुथिइ बम तयाबीधुंकूगु दु ।

भूमिगत जुयाच्वंगु संयुक्त जाति मुक्ति मोर्चां निगूगु चरणया आन्दोलन थ्वहे वाःनिसें न्ह्याकेगु धकाः जनकारवाही घोषणा याःगु खः ।

किपुली प्रचार निषेध

संघीयता विरोधीतय्त किपूमि जनतां प्रचारप्रसार निषेध याःगु दु। नेवाःतय्सं संघीय गणतन्त्र नेपाः दुने नेवाः स्वायत्त राज्य दयेमाः धकाः घोषणा यायेधुंकूगु अवस्थाय् संघीयता विरोधया छुं नं कथंया गतिविधि नापं प्रचार तकं याके मबीगु धकाः अभियान हे न्ह्याकूगु दु। थ्व हे झ्वलय् वंगु शुक्रवाः बहनी संघीयताया विरोध यानाः मसाल जुलुस वःपिंत दाया छ्वःगु दुसा संघीयता विरोधि पम्प्लेत तकं म्हिगः सुथय् फुक्कं खुनाछ्वःगु दु ।