नेवाः पुजारी जुइमाः - नेवाः देय् दबू

पशुपतिइ मूल पुजारी नियुक्तिया खँय् ब्वलंगु समस्यायात कयाः नेवाः देय् दबुलिं थःगु सरोकार क्यंगु दु । देय् दबुलिं छगू वक्तव्य पिकासें सरकारं भारतीय मूलया भट्टयात चीकाः उकिया पलेसा नेपाःमि पुजारी नियुक्त याःगु लसकुस यायेबह जू तर थथे याःबलय् पशुपतिनाथनाप स्वापू दुगु फुक्क पुजापाठ जात्र पर्व न्ह्याकेगु ज्या नेपालमण्डलया आदिवासी नेवाः समुदायं न्ह्याका वयाच्वंगु खँयात धाःसा ल्वःमंकूगु खनेदत धाःगु दु । जुजु यक्ष मल्लया इलंनिसें पशुपतिइ मू पुजारीया भाला नेवाः द्यःब्रम्हूतय्त बियातःगु व पशुपतिनाप स्वापू दुगु मेमेगु सकतां पुजा पाठ जात्रा संस्कृतित नेवाः समुदायया द्यःला, धोबी (संगत), कुसले (जोगी), बिसेत (ध्वं), नायः (खड्गी), वैद्य, भण्डारी (राजभण्डारी) व ज्यापु जातिं मंकाः कथं न्ह्याका वयाच्वंगु खँ धासें वक्तव्यय् धयातःगु दु 'थ्व ल्याखं पशुपतिनाथया सकतां सांस्कृतिक धार्मिक ज्या धइगु नेवाः समुदायया अधिकार क्षेत्रया खँ खः ।'

न्हू नेपाःया स्वायत्तताया मान्यता कथं संघीय राज्य दयेकेत्यंगु इलय् नेपालमण्डल दुनेया संस्कार संस्कृति न्ह्याकेगु अग्राधिकार नेवाः समुदायया जुइमाः धइगु नेवाः देय् दबूया मान्यता खः धासें पशुपतिया पुजाय् माःपिं मू पुजारीलिसें मेपिं सहायकत नं न्हापा थें मुक्कं नेवाः समुदायया मनूतय्त भाला बीमाः धकाः माग यानातःगु दु । लिसें पशुपतिया आःया समस्यायात त्वहः चिनाः गुगुं नं कथंया राजनीतिकरण मयायेत इनाप यासें वक्तव्यय् भारतीय पक्ष व प्रतिगामी शक्तिं थ्व स्थितियात थःगु स्वार्थ कथं छ्यलेत स्वयाच्वंगु खँय् सतर्क जुइत नं आग्रह यानातःगु दु ।