संयन्त्रय् प्रधानमन्त्री नं तयेमाः : पौडेल
येँ (सन्ध्या टाइम्स्)/नेपाली कांग्रेसया संसदीय दलया नेता रामचन्द्र पौडेलं प्रधानमन्त्री माधव नेपालयात नं उच्चस्तरीय संयन्त्रय् दुथ्याकेमाः धयादीगु दु। वय्कलं प्रधानमन्त्री मदुगु उच्च स्तरीय राजनीतिक संयन्त्र प्रभावकारी जुइ मखु धयादीगु दु। बेलायत सरकारया ब्वनाय् अन वने न्ह्यः त्रिभुवन अन्तर्राष्ट्रिय विमानस्थलय् पत्रकारलिसे खँ ल्हासें नेपाली कांग्रेसया उप सभापति तकं जुयादीम्ह पौडेलं उच्च स्तरीय राजनीतिक संयन्त्रय् प्रधानमन्त्री नापं मेमेगु दलया नेतातय्त नं दुथ्याकेमाः धयादिल ।
राजनीतिक निकास, शान्ति प्रक्रिया व संविधान निर्माणया निंतिं उच्चस्तरीय राजनीतिक संयन्त्रयात प्रभावकारी यायेगु खःसा उकी प्रधानमन्त्री नं दुथ्याकेमाःगु खँ नं वय्कलं कनादीगु दु ।
लुमंकेबहःजू वंगु शुक्रवाः जक कांग्रेसया सभापति गिरिजाप्रसाद कोइरालाया नेतृत्वय् माओवादीया नायः प्रचण्ड व एमालेया नायः झलनाथ खनालयात दुथ्याकाः स्वम्हेसिया उच्चस्तरीय संयन्त्र दयेकूगु खः ।
