सुनिताया सफू विमोचन
येँ (सन्ध्या टाइम्स)/च्वमि मय्जु सुनिता मानन्धरया बुद्ध धर्म सम्बन्धी च्वसु मुना 'बुद्ध शिक्षा नाप सामाजिक सरोकार' म्हिगः छगू ज्याझ्वःया दथुइ विमोचन जुल। जापानं झायादीम्ह मूपाहां मय्जु सेचुजी हिरोशिमां विमोचन यानादीगु खः ।
ज्याझ्वलय् सफुली दुथ्याःगु च्वसुयात कयाः प्रा. सुरेन्द्रमान वज्राचार्यं समीक्षा यानादिल। 'सन्ध्या टाइम्स'या संपादक सुरेश मानन्धरं उकिया विषयवस्तु व शैलीयात कयाः टिप्पणी यानादिल। 'सन्ध्या टाइम्स' पिहां वःगु च्वसुत मुनाः उगु सफू पिथंगु खः ।
सफूया प्रकाशक संस्था युवा बौद्ध समूहया नायः त्रिरत्न मानन्धरया सभापतित्वय् जूगु उगु ज्याझ्वलय् च्वमि सुनिता मानन्धर व मूपाहां हिरोशिमाजुं जापानय् च्वनाबलय्सिया थःपिनि स्वापू व अनुभवन बारे कनादीगु खः। ज्याझ्वलय् समूहया न्वकु त्रिरत्न तुलाधरं लसकुस यानादीगु खःसा समूहपाखें जापानी पाहांपिंत उपहार नं देछाःगु खः ।
