३१ वडा बचे यायेत स्थानीय ल्याय्म्ह सक्रिय
येँ (सन्ध्या टाइम्स)/येँया ३१ वडाय् लाःगु बाग बजाः लागाय् जुइगु सतक जाम, प्रदुषण, फोहोर, सार्वजनिक मतया अभाव, असुरक्षा व आः वयाः शुरु जुया वःगु वेश्यावृत्तिपाखें समेत आजित जूपिं स्थानीय ल्याय्म्हतय्सं थ्व फुक्क विकृति चीकेगु ताः तयाः '३१ वडा सुधार समिति' गठन याःगु दु। स्थानीय भाजु कृपाल तण्डुकारया अध्यक्षताय् गठन याःगु थ्व समितिं उगु वडाय् थीथी ज्याझ्वः याना वयाच्वंगु दुसा म्हीग बाग बजार बस पार्कंनिसें पुतलिसतक तकया लागाय् सफाई ज्याझ्वः न्ह्याकल ।
समितिं वंगु छुं ई न्ह्यः तिनि बाग बजाः लागाया सतकय् मत तयेकेगु ज्या याःगु खःसा आः बाग बजाःया पेटी सुधारपाखे पलाः न्ह्याकेत्यनागु खँ अध्यक्ष तण्डुकारं कनादीगु दु। वडायात थुपिं थुपिं सम्पूर्ण विकृतिं मुक्त यायेत ज्याझ्वःत न्ह्याकेगु खँ नं वय्कलं कनादिल ।
