कारोबार थहां वंसां नेप्से क्वय्
येँ (सन्ध्या टाइम्स)/नेपाल स्टक एक्सचेन्जय् थ्व वालय् ग्वीन्यागू कम्पनीया मुक्कं ४४४० गू कारोबार जुल। थुगु कारोबारय् स्वंगू लाख न्यय्च्याद्वः व गुसः कित्ता शेयर न्याये-मी जुयाः झिंन्हय्गू करोड ख्वीस्वंगू लख चय्न्याद्वः तका दांया कारोबार जुल। दांया वंगु वालय् स्वयां थुगु वालय् २ दशमलव शुन्य ९ प्रतिशतं थहां वंगु दु ।
वंगु वालय् ४६४३ गू कारोबारय् स्वंगू लख स्वीन्हय्द्वः व न्हय्सः कित्ता शेयर न्याये-मी जुयाः झिंन्हय्गु करोड नीन्हय्गू लख ख्वीन्हय्द्वः तका दांया कारोबार जूगु खः। थ्व छवाःया शेयर कारोबार दांया कारोबार थहां वंसां बजार परिसुचक धाःसा कुहां वःगु दु ।
थ्व वालय् बजार परिसुचक ११ दशमलव १५ अंकं कुहां वःगु दु। वाःया न्हापांगु न्हि ५४६ दशमलव ९६ अंकं शुरु जूगु शेयर कारोबार वाःया लिपांगु न्हि ५३५ दशमलव ८१ अंकय् थ्यंकाः बजारु बन्द जूगु ख। अथे हे थ्व वालय् 'क' वर्गय् लाःगु कम्पनीया जक च्यागू करोड ख्वीप्यंगू लाख तका दांया कारोबार जूगु दु। स्टक एक्सचेन्जय् वालय् जूगु कूल कारोबारया थ्व ४८ दशमलव ९९ प्रतिशत खः ।
'क' वर्गया कारोबार मापन याइगु सेन्सेटिभया सुचकांक नं ३ दशमलव ९० अंकं कुहां वःगु दु। सेन्सेटिभया कारोबार थ्व वालय् १३५ दशमलव २४ अंकं शुरु जुयाःया वाःया लिपांगु न्हि १३१ दशमलव ३४ अंकय् थ्यकाः कारोबार बन्द जूगु खः।
स्टक एक्सचेन्जया कथं निगू करोड स्वीगू लख तका दां कारोबार याःगु लिधंसाय् स्टायण्डर्ड चार्टर्ड, स्वीन्याद्वः कित्ता शेयर न्याये-मी जूगु लिधंसाय् सनराइज बैंक व थ्व वाःया दुने न्हय् व झिंस्वंक्वः कारोबार याःगु लिधंसाय् भिवोर विकास बैंक दकलय् न्ह्यःने लाःगु दु ।
थ्व वाःया दुने जनरल फाइनान्सया हकप्रद शेयर नेपाल धितोपत्र बोर्डय् सूचीकृत जूगु दु ।
