थौं फोरम बैठकय् घमासान जुइगु
मधेशी जनअधिकार फोरमया संसदीय दलया बैठक थौं च्वनेत्यंगु दु । फोरमया बहुमत सभासदतय्सं म्हिगः प्रधानमन्त्री प्रचण्डयात थःगु पार्टीया मन्त्री विजयकुमार गच्छेधारं पार्टीया नीति कथं ज्या मयाःगुलिं वयात लित सःतेत माग यासें निवेदन बीवं थौं थ्व बैठक च्वनेत्यंगु खः ।
बैठकं फोरमया संविधानसभा दलया नेता पदं गच्छेधारयात चीके फइगु खँ फोरम स्रोतं धाःगु दु । बहुमत सभासदत गच्छेधारया विरोधय् दु धासें यदि थौंया बैठक नं गच्छेधारया सभापतित्वय् च्वनीगु जुल धाःसा सभासदतय्सं संसदीय ज्याकुथी तालं ग्वयेगु ख्याच्वः बिउगु दु ।
बहुमत सभासदतय्सं प्रधानमन्त्रीयात निवेदन बीवं फोरम दुनेया विवाद पिने पिहां वःगु दु । फोरमया थ्व विवादया कारणं पार्टी कुचा दले फइगु विश्लेषण जुयाच्वंगु दु ।
उखे म्हीग तिनि फोरमया ५२ मध्यय् ३६ म्ह सभासदतय्सं थःपिनि मन्त्री लित सःतेगु धकाः पौ बिउगु खः ।
