कांग्रेस नं प्रजा परिषद थें जुइ : खड्का
नेपाली कांग्रेसया केन्द्रीय दुजः खुमबहादुर खड्कां नेपाली कांग्रेसं तरुण दस्ता देयेकाः प्रतिवाद मयासाः पार्टीया अवस्था प्रजा परिषदया थें जुइगु ख्याच्व: बियादीगु दु । वयेकलं धयादिल, - 'कांग्रेस कार्यकर्तातय्त जुयाच्वंगु ज्यादतीया प्रतिकार यायेगु विषयलय् कांग्रेसं इलय् हे चेते मजूसा: राष्ट्रिय प्रजातन्त्र पार्टी जुया प्रजा परिषद्य् सीमित जुइ ।'
प्रेस युनियनं आइतवाः बाग्लुङय् याःगु पत्रकार सम्मेलनय् वयेकलं पार्टी कार्यकर्ताया हत्या यासां टुलुटुलु स्वयाच्वनेगुया छुं अर्थ मदुगु धयादिसें आः कांग्रेसं नं तरुण दस्ता देयेकाः न्ह्याः वनेमाःगु खँय् बः बियादिल । वयेकलं पार्टीया रक्षाया निंतिं नं तरुण दस्ता आवश्यक जूगु धयादिल ।
वयेकलं माओवादीं हत्या, लुटपाट व छेँबुँ कब्जा यायेगु ज्या मत्वःतुगु धयादिसें माओवादीं मेपिनिगु सम्पति लित मब्यूतल्ले उपिं नाप सहकार्य मजुइगु धयादिल । वयेकलं कांग्रेस धाःसा सहमतिया खँल्हाना जुइगु व एमाले व माओवादी धःसाः अर्थ सैनिक दस्ता देयेकाः देशय् अराजक गतिबिधि यानाः जूगु द्वपं बियादिल ।
वयेकलं एमाले व माओवादीं युथ फोर्स व वाईसीएल विघटन याःसाः कांग्रेस नं तरुण दस्ता देयेकेगु पक्ष मदुगु धयादिल । नापं वयेकलं कांग्रेसया नेतात दुरदृष्टि मजूगुलिं हे पार्टी कमजोर जूगु नं धयादल ।
