संयन्त्रय् छुं नं कथंया विवाद मदु : खनाल
नेकपा (एमाले)या अध्यक्ष झलनाथ खनालं स्वंगू राजनीतिक दलया उच्चस्तरीय राजनीतिक संयन्त्रय् छुं नं कथंया विवाद मदुगु खँ धयादीगु दु ।
प्रेस चौतारी पर्वतं आइतवाः याःगु पत्रकार सम्मेलनय् न्ववानादिसें वयेकलं संयन्त्रया बारे विवाद मदुगु धयादिसें थुकीं शान्ति प्रकृयायात निष्कर्षय् थ्यंकेत, इलय् हे संविधान निर्माण यायेत व राजनीतिक गतिरोध अन्त्य यायेत नं महत्वपूर्ण भूमिका म्हितिगु धयादिल । वयेकलं संयन्त्र गठन यायेमाःगु खँ एमालें न्हापां निसें हे धयाच्वंगु नं कनादिल ।
ज्याझ्वलय् एमालेया वरिष्ठ नेता केपी शर्मां ओलीं संयन्त्रया छुं अर्थ मदु धकाः बियादीगु अभिव्यत्ति बारे पत्रकारतय्सं न्यंगू न्ह्यसलय् अध्यक्ष खनालं संयन्त्रं बांलाक ज्या यायेमाः धकाः ओलीं भिंतुना बियादीगु धयादिल । वयेकलं सहमतिया आधारय् मेमेगू दलयात नं संयन्त्रय् दुथ्याकीगु धयादिल ।
अथेहे वयेकलं आन्दोलन यानाः नागरिक सर्वोच्चता कायम मजुइगु धयादिसें माओवादीं अराजक व जनविरोधी ज्या यानाच्वंगुलिं माओवादीं ल्ह्वंगु नागरिक सर्वोच्चताया मागया छुं अर्थ मदुगु धयादिल ।
