स्वनिगः बन्दया प्रतिकारय् मोटरसाइकल र्याली
न्हिनसिया स्वाता: ई लिपा: बन्द लितकाल
अन्तरिम संविधानं नेपाः संघीय देय् जुइधुंकूगु खँया ग्यारेन्टी यायेधुंकूसां संविधानसभाय् दुथ्याःगु राष्ट्रिय जनमोर्चां संघीयताया विरोधय् आइतवाः स्वनिगः बन्द याःगु दु । उकीया प्रतिकारय् स्थानीय नेवाःतय्सं मोटरसाइकल र्याली सहित प्रतिकार याःगु दु ।
नेवाः स्वायत्त मंकाः राज्य समितिया ग्वसालय् स्थानीय नेवाःतय्सं नेवाः राज्यया ध्वाँय् सहित बसन्तपुली उगु र्याली पिकाःगु खः । र्याली बसन्तपु, त्रिपुरेश्वर, कलंकी, बालाजु जुया हानं बसन्तपुली वयाः क्वचाःगु खः । अथेहे नेवाःतय्सं हानं येँया न्हू बानेश्वर, चाबहली, गौशाला नापं स्वनिगःया थीथी थासं मोटरसाइकल र्याली पिका:गु ख: ।
स्थानिय दबाव व स्वनिग:या नेवा:तय्सं बन्दया प्रतिकार यायेवं न्हिनसिया स्वता: इलय् रत्नपार्कय् छगू सभा यासें जनमोर्चां बन्द लितका:गु ख: ।
वस्वयां न्ह्यः जनमोर्चां बन्दया घोषणाया कारणं स्वनिगःया प्रमुख सतकया पस: प्राय बन्द जूसां स्वनिगःया अधिकांश दुने गल्ली गल्लीया पसः, बजाःत चा:गु ख: । पस: बन्द याका: जूपिं जनमोर्चाया प्यम्ह कार्यकर्तायात स्थानिय नेवा:तय्सं ठमेलं ज्वना: प्रहरीयात ल:ल्हा:गु दु । बन्दं स्वनिगःया प्रमुख सतकय् गाडी धाःसाः उली चलेजूगु मदुसां आपालं मोटरसाइकलत धाःसा चले जुयाच्वंगु दु । मोटरसाइकल र्याली लिपा अधिकाशं थाय्या पस: व सतकय् नं गाडी चले जुइ शुरु जूगु ख: ।
बन्द आह्वानकर्तातय्सं आइतवाः सुथय् बन्दया अवज्ञा यासें गाडी चलेयाःगु धालें खुगः सवारी साधनय् तोडफोड याःगु दु । वाफल ताहाचलय् सोल्टी होटलया बा १ क ४६५० नम्बरया बसयात बन्दकर्तातय्सं तोडफोड याना: मि च्याकाब्यूगु दु । अथेहे बालाजुलय् बा १ ज ९०४७ व बा १ ज ७२०० नम्बरया निग: ट्याक्सी, डिल्लीबजारय् बा १ ज ४७११ नम्बरया ट्याक्सी व यलया कुमारीपाटीइ बा १ ख ७०५१ नम्बरया ट्रकय् तोडफोड या:गु ख: ।
प्रहरीं बन्द याका: जूपिं जनमोर्चाया उपाध्यक्ष सन्तबहादुर नेपाली सहित स्वीम्ह स्वयां अप्व: कार्यकर्तायात ज्वनायंकूगु ख: ।
