इलय् हे संविधान निर्माण मजूसाः विद्रोह यायेगु प्रचण्डया ख्याच्वः
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' शान्ति प्रकृयायात निष्कर्षय् थ्यंकेत व इलय् हे संविधान च्वये मब्यूसाः विद्रोह यायेगु ख्याच्वः बियादीगु दु ।
इलय् हे संविधान निर्माण यायेत खबरदारी यायेत शुक्रवाः विराटनगरय् ग्वसाःग्वःगु ज्याझ्वलय् वयेकलं अज्याःगु परिस्थिति वःसाः जनतायात सतकय् हयाः विद्रोह यायेगु धयादिल । वयेकलं थंज्याःगु विद्रोहयात सुनां नं पनेमफइगु धयादिसें थंज्याःगु परिस्थितिया सृजना यायेमबीत मेमेगू दलयात इनाप यानादिल ।
दलतय्त दबाब बीत इन्सेकं याःगु ज्याझ्वलय् माओवादीं अध्यक्षं बिहीवाः प्रधानमन्त्री माधवकुमार नेपालं थःगु पार्टीयात लिट्टेया अवस्थाय् थ्यनीगु धकाः बियादीगु अभिव्यक्ति प्रति नं आक्रोस प्वंकादिल ।
अथेहे ज्याझ्वलय् न्ववानादिसें नेकपा (एमाले)या अध्यक्ष झलनाथ खनालं राजनीतिक दलत दथुइ दुगु मतभेद अन्त्य यासें सहमति व सहकार्य यानाः वनेमाःगु खँय् बः बियादिल । वयेकलं संविधा निर्माण व शान्ति प्रकृयाय् वइगु दक्वं समस्याया समाधान मिलेजुयाः यायेमाः धयादिल ।
नेपाली कांग्रेसया उपसभापितं देय्या शान्ति प्रकृयायात न्हापांगु प्राथमिकताय् तयाः राजनीतिक दलत न्ह्याः वनेमाःगु बिचाः प्वंकादिल । वयेकलं सत्ता कब्जा यायेगु खँ पाखें शान्ति प्रकृयायात ग्वाहालि मजुइगुलिं थंज्याःगु खँ मल्हायेत माओवादीयात इनाप नं यानादिल ।
ज्याझ्वल् मधेशी जनअधिकार फोरमया अध्यक्ष उपेन्द्रयादवं स्वंगू दलया सहमितं जक समाधान पिहांमवइगु धयादिल । वयेकलं संसदय् दुगु दक्वं दलतय्त शक्ति बारबर यानाः इनेमाःगु खँय् बः बियादिल ।
