'इलय् हे संविधान निर्माण मजुसां स्थिति भयावह जुइमखु'
संविधानसभाया अध्यक्ष सुवासचन्द्र नेम्वाङं जेठ १४ गते दुने संविधान च्वये मफुसां देशय् भयावह स्थिति मवइगु खँ धयादीगु दु । वयेकलं राजनीतिक दलत छप्पँ जुइफुसाः देशय् न्ह्याःगु कथंया थाकूगु परिस्थिति वासां सामना यायेफइगु धयादिल ।
दाङया तुल्सीपुरय् शुक्रवाः सामुदायिक वन महासंघया केन्द्रीय विशेष महाधिवेशनया उल्लेज्या यानादिसें वयेकलं दलत दथुइ यक्व हे मतभेदत दुसां इलय् हे संविधान च्वयेत दक्वं दलत प्रतिबद्ध जूगु धयादिल । वयेकलं इलय् हे संविधान जारी यायेत व संसद् अवरुद्ध जुइमबीत थः क्रियाशिल व सचेत जूगु नं धयादिल ।
आः देय् छुं नं हालतं ल्यूने वनेमफइगु धयादिसें संविधानसभा अध्यक्ष नेम्वाङं सुंनां नं प्रतिगामी खँल्हायेवं देय्या लँपू ल्यूने मवनीगु धयादिल । वयेकलं छम्ह निम्ह नेतातय्सं राजतन्त्रया पक्षय् व संघीयताया विरोधय् सः थ्वयेकेवं देय् अज्याःगु लँपू पाखें वनेमफइगु बिचाः प्वंकादिल ।
