सहमति लिपाः माओवादी पाखें भोजपुरा बन्द लितकाल
कार्यकर्ता हत्याया विरोधय् एकीकृत नेकपा (माओवादी)या भोजपुरा राज्य समितिं आह्वान याःगु अनिश्चितकालीन भोजपुरा बन्द शुक्रवाः न्हिनय् निसें लितकाःगु दु ।
माओवादी जिल्ला संगठन समिति बाराया प्रतिनिधि, सुरक्षा निकायया प्रमुख, बाराया प्रमुख जिल्ला अधिकारी दथुइ शुक्रवाः जिल्ला प्रशासन ज्याकू बाराय् जुगु वार्ता सहमति जुइवं माओवादीं बन्द लितकाःगु खः ।
वार्ताय् सीपिनि छेँजःयात छगू लख नयय्द्वं राहत बीगु, सीपिंत सहिद घोषणा यायेत मन्त्रालययात सिफारिश यायेगु व घाःपाः जूपिंत सरकारं वसः याकेगु लगायत न्हय्गु बुँदे सहमत जूगु खः ।
बैठकय् माओवादीया जिल्ला सेक्रेटरी शम्भु मण्डल, ईन्चार्ज लालकिरण, जिल्ला प्रहरी ज्याकू बाराया प्रहरी उपरीक्षक महेन्द्र पोखरेल, सशस्त्र प्हरी बल सीमा सुरक्षा ज्याकू बाराया सश्स्त्र प्रहरी उपरीक्षक मानिसंह मौनी लगायतया उपस्थिति दुगु खः ।
सहमति लिपाः सीपिं माओवादी कार्यकर्तातय् अन्त्येष्टी शुक्रवाः हे याःगु दु ।
बुधवाः बहनी अज्ञात पुचलं क्येकूगु गोलीं लानाः माओवादी भोजपुरा राज्य समितिया दुजः रामप्रकाश यादव, क्षेत्रीय समितिया दुजः दारा यादव व गां कमिटीया दुजः अम्बिका महतो सीगु खः । उगु हे घटनाय् क्षेत्र नम्बर २या सेक्रेटरी कन्हैया यादव व गां कमिटी दुजः सियाराम कुशवाहा गम्भीर घाःपाः जूगु खः ।
