सहमतिया निंतिं कुतः यानाःतुं च्वने : प्रम

प्रधानमन्त्री माधवकुमार नेपालं एनेकपा (माओवादीं) जंगली प्रवृत्ति क्यनाच्वंगु धयादिसें थुकीया अन्त्य मजुतल्ले देशय् शान्ति स्थापना मजुइगु खँ धयादीगु दु । वयेकलं सहमतिया निंतिं सरकारं लचकता क्यनाच्वंगु व सहमतिया निंतिं थम्हं कुतः यानाःतुं च्वनेगु खँ धयादिल ।

चितवनय् शुक्रवाः जूगु छगू ज्याझ्वलय् न्ववानादिसें प्रधानमन्त्री नेपालं माओवादीयात राजनीतिक समस्याया निकास राजनीतिक तवरं हे मालेत इनाप यानादिल । वयेकलं थः येँ लिहांवनेवं समस्या समाधान यायेत गम्भीर जुयाः लगे जुइगु नं धयादिल ।

सहमतिया हे आधारय् माओवादीयात जंगलं सिंहदरवार तक थ्यंकाःगु धयादिस वयेलं माओवादीयात आन्दोलन त्वःताः सहमतिया राजनीति शुरु यायेत इनाप यानादिल । वयेकलं उच्चस्तरीय राजनीतक संयन्त्र निर्माण लिपाः आः देशय् निकास पिहांवइगु खँय् नं विश्वास प्वंकादिल ।