संविधानसभाय् नेपाल संवत्या पहल जूगुलिं मंकाः खलःया सुभाय्
येँ (सन्ध्या टाइम्स)/नेपाःया मौलिक संवत् नेपाल संवत्यात आः निर्माण जुइत्यंगु न्हूगु संविधानया नामंनिसें हे न्ह्यथनेमाः धकाः नेपाः राष्ट्रिय पार्टी पाखें जूगु कुतःयात सकारात्मक रुपं कायेमाःगु खँ नेपालभाषा मंकाः खलकं धाःगु दु। मंकाः खलःया नायः पद्मरत्न तुलाधरं थन छगू वक्तव्य पिकासें नेपाःया मौलिक संवत् नेपाल संवत्यात आधिकारिक मान्यता बीकेया निंतिं नेपालभाषा मंकाः खलकं स्वंगू दशक न्ह्यवंनिसें न्ह्याका वयाच्वंगु शान्तिपूर्ण आन्दोलन लिपा थुकियात राष्ट्रिय संवत् धकाः नेपाः सरकारं मान्यता बीगु धकाः घोषणा याःसां थुकिया व्यावहारिक अभ्यास आः तकं जुइ मफयाच्वंगु सन्दर्भय् न्हूगु संविधान निर्माण जुयाच्वंगु इलय् थुगु संवत् बारे चर्चा यायेगु पाय्छिगु पलाः खः धयादीगु दु। वयकलं नेपाल संवत्या आधिकारिक छ्यलाबुलाया निंतिं जूगु थुगु कुतःयात नेपालभाषा मंकाः खलकं च्वछासें उकिया निंतिं सुभाय् नं देछानादीगु दु। लिसें, नेपाल संवत्या आधिकारिक मान्यता प्राप्तीया निंतिं सकल नेपाःमि छप्पँ छधी जुइमाःगु आवश्यकतायात वाःचायेकुसें थुगु अभियानय् सक्रिय जुइत नं वयकलं इनाप यानादीगु दु ।
