संघीयताया सवालय् राजनीतिक ध्रुवीकरण तीव्र
येँ (सन्ध्या टाइम्स)/संघीय लोकतान्त्रिक गणतन्त्र नेपाः धकाः अन्तरिम संविधानय् नं च्वयेधुंकूगु अवस्थाय् संघीयताया विरोधीतय्सं आन्दोलन घोषणा यायेवं आः लिपांगु इलय् संघीयताया पक्ष व विपक्षपाखें ब्यागलं ब्यागलं कथंया अभियानत न्ह्याकूगु दु ।
राष्ट्रिय जनमोर्चां छुं दिं न्ह्यवंनिसें हे संघीयताया विरोधय् आन्दोलन याना वयाच्वंगु खःसा नेवाःतय्सं नेवाः स्वायत्त राज्य नापं संघीयताया पक्षय् म्हिगःनिसें अभियान न्ह्याकूगु दु। म्हिगः हे संघीयताया पक्षय् मधेशी जनआधिकार फोरमं अले राष्ट्रिय प्रजातन्त्र पार्टी नेपालं संघीयताया विरोधय् आन्दोलन घोषणा याःगु दु। लिपांगु इलय् वयाः राजनीतिक पार्टीया नेतात नं संघीयताया पक्षय् कि विपक्षय् धकाः दनावःगु दुसा आः राजनीतिक ध्रुवीकरण नं थ्व हे विषययात कयाः जुइगु प्रायः निश्चित जूगु दु ।
संघीयताया पक्षय् सु विपक्षय् सु ?
संघीयताया पक्षय्
नेवाः स्वायत्त राज्य जन जागरण अभियान:
थौं बसन्तपुली ४ बजे पर्चा इनाः थाय्थासय् कोणसभा, कन्हय् रत्नपार्क, कंस बसन्तपुली सभा, म्हिगःनिसें न्ह्याकूगु उगु अभियान छवाः तक न्ह्याइ।
मधेशी जनअधिकार फोरम:
माघ ३ गते प्रजिअ मार्फत प्रमयात ज्ञापनपत्र लःल्हाइगु, ५ गते मधेस बलिदान दिवस, ८ गते जिल्ला सदरमुकामय् प्रदर्शन, ११ गते जिल्ला सदरमुकामय् मसाल जुलुस, १४ गते जिप्रका न्ह्यःने निघौ तक धर्ना, १५ गते सर्लाहीइ विरोध सभा, १६ गते सप्तरी व कैलालीइ विरोध सभा व १७ गते सदरमुकामय् जुलुस व विरोध सभा।
संघीयताया विपक्षय्
राष्ट्रिय जनमोर्चा:
पुस २९ गते पूर्वाञ्चल बन्द, १६ गते वागमती नापं स्वनिगः बन्द, राप्ती-लुम्बिनी बन्द व फागुन ५ निसें २० गते तक देय्न्यंकं संघीयता विरुद्ध अभियान
राष्ट्रिय प्रजातन्त्र पार्टी नेपाल:
माघ ६ व ७ गते देय्न्यंकं घरदैलो व कोणसभा, ७ व ८ गते स्वनिगलय् घरदैलो व कोणसभा, ८ गते जिल्ला सदरमुकाम व संविधानसभाय् धर्ना, फागुन १० गते स्वनिगः बन्द व ११ गते सिंहदरवार घेराउ नापं सत्याग्रह ।
