माओवादीं स्वंगः ट्रकय् मि तल
येँ (सन्ध्या टाइम्स्)/बाराय् माओवादीया स्वम्ह कार्यकर्तायात आक्रमण यानाः स्याना बिउगु विरोधय् उगु पार्टीया भोजपुरा राज्य समितिं म्हिगःनिसें बारा, पर्सा व रौतहट जिल्ला अनिश्चितकाल तकया निंतिं बन्द याःगु दुसा बन्दं यानाः थौं नं सुथंनिसें उगु लागाया जनजीवन प्रभावित जूगु दु ।
स्वंगू हे जिल्लाय् यातायात, कलकारखाना, शिक्षण संस्था, बजाः बन्द जुयाच्वंगु दु ।
माओवादी प्रदर्शनकारीय्सं बन्दयात अवज्ञा याःगु धकाः थौं सुथय् ५ बजे बाराया बालगंगा लिक्कसं ग. १ ख २५३४ नम्बरया छगः मालबाहक ट्रक व ग. १ ख १२२५ नम्बरया मेगु ट्रकय् मि तयाः ध्वस्त याना बिउगु दु ।
अथे हे बजनी लागाय् नं छगः ट्रकय् मि तयाः ध्वस्त यान बिउगु दु। ट्रकय् मि तयेवं मि स्याये धकाः वंम्ह सशस्त्र प्रहरीया सहायक निरीक्षक भावराज फुयाँल मिं पुनाः घाःपाः जूगु खँ सम्बद्ध प्रहरीं इकाइं धाःगु दु।
सीम्ह ज्वनाः प्रदर्शन
म्हमसिउपिं मनूतय्सं गोलीं कयेकाः सीपिं स्याना बिउपिं माओवादीया स्वम्ह कार्यकर्तायात सहिद घोषणा यायेमाःगु, आक्रमण याःपिंत कारवाही यायेमाःगु नापं क्षतिपूर्ति बीमाःगु माग यासें माओवादीं आन्दोलन याइगु जूगु दु। भोजपुरा राज्य समितिया छ्याञ्जे अन्जना विशंखें 'सन्ध्या टाइम्स'यात कनादी कथं माग पूरा मजूतले कार्यकर्तातय्सं सीम्ह हे ज्वनाः प्रदर्शन यायेगु व भोजपुरा बन्द हे याना तयेगु ग्वसाः दयेकूगु दु ।
