बन्द ज्याझ्वः अवैध घोषणा
येँ (सन्ध्या टाइम्स)/भारतीय प्रान्त आसामया गुवाहाटी उच्च न्यायालयं आवंलि छुं नं कथंया बन्द ज्याझ्वःयात अवैध घोषणा याःगु दु। अदालतं बन्द ज्याझ्वलं जनताया आधारभूत अधिकार हनन् याइगु जूगुलिं थुकियात अवैध घोषणा याःगु खः ।
उच्च न्यायालयया प्रधान न्यायाधीश जास्ती चालेम्श्वर व न्यायाधीश अरुणचन्द्र उपाध्यायया इजलाशं थ्व ऐतिहासिक फैसला याःगु खः। बन्दयात अवैध घोषणा यायेमाः धइगु माग यासें अनया पत्रकार, सामाजिक कार्यकर्ता व आसामया पुलांपिं प्रहरी अधिकृततय्सं थनिं न्यादँ न्ह्यः थ्व रिट दायर यानातःगु खः। आसामय् अप्वः यानाः बन्द आयोजना यानाः जनतायात दुःख बियाच्वंगु १९ गू संघ संस्थायात विपक्षी दयेकाः दायर यानातःगु थ्व रिट न्यादँ न्ह्यवंनिसें विचाराधीन जुयाः थानाच्वंगु खः ।
उकी अप्वः बन्द आयोजना याइगु अल-आसाम स्टुडेन्टस् युनियन, अल बोडो स्टुडेन्टस् युनियन थेंज्याःगु संगठनयात विपक्षी दयेकातःगु दु ।
आसामय् वंगु निगू दशक न्ह्यवंनिसें न्हिंन्हिं धइथें गनं कि गनं बन्द ज्याझ्वः जुया वयाच्वंगु दु ।
