कोइरालाया संयोजकत्वय् उच्चस्तरीय संयन्त्र
प्रमुख स्वंगू दलया नेतातय्सं शान्ति प्रकृयायात निष्कर्षय् थ्यंकेत व निर्धारित इलय् हे संविधान निर्माण यायेत नेपाली कांग्रेसया सभापति गिरिजाप्रसाद कोइरालाया संयोजकत्वय् उच्चस्तरीय राजनीतिक संयन्त्र निर्माण याःगु दु ।
शुक्रवाः कोइरालाया निवास महाराजगंजय् च्वंगु शीर्ष नेतातय् बैठकं कोइरालाया संयोजकत्वय् माओवादी अध्यक्ष पुष्पकमल दाहाल 'प्रचण्ड' व एमाले अध्यक्ष झलनाथ खनाल दुजः दुगु संयन्त्र गठन याःगु खः ।
वंगु बुधवाः च्वंगु स्वंगू दलया नेतातय् बैठकय् सहमित जू कथं थौं उच्चस्तरीय संयन्त्र गठन जूगु खः । थौं च्वंगू बैठकं संयन्त्रय् संविधानसभाय् दुथ्याःगु दक्वं दलतय् नेतातय्त दुथ्याकीगु सहमति याःगु दु ।
संयन्त्र गठन लिपाः माओवादी अध्यक्ष प्रचण्डं संयन्त्रं शान्ति प्रकृया व संविधान निर्माणय् महत्वपूर्ण भूमिका म्हितिगु कनादिल । वयेकलं संयन्त्र निर्माण लिपाः ताः ई तक न्ह्यानाच्वंगु राजनीतिक गतिरोध ज्यनीगु विश्वास नं वयेकलं प्वंकादिल ।
