सिन्धुलीं लडाकू बहिर्गमन शुरु

ताः ईया कुतः लिपाः अनमिनं अयोग्य प्रमाणित जूपिं एनेकपा (माओवादी)या सेनाया अयोग्य लडाकूतय् बहिर्गमन सिन्धुलीया दुधौलीलय् दुगु २ नम्बर डिभिजनं शुरु याःगु दु ।

अनमिनं निगूगु चरणया प्रमाणीकरणं अयोग्य ठहर याःपिं माओवादी सेनाया लडाकूयात बिहीवाः औपचारिक विदाइ याःगु खः । माओवादीया सचिव सीपी गजुरेल, जनमुक्ति सेनाया प्रमुख नन्दकिशोर पुन 'पासाङ', डेपुटी कमाण्डर चन्द्रदेव खनाल 'बलदेव', संयुक्त राष्ट्र संघीय आवसिय प्रतिनिधि रोवर्ट पाइपर, शान्ति मन्त्रालयया सचिव पुण्यप्रसाद न्यौपाने लगायत सरकारी अधिकारीतय् पुचलं अयोग्य लडाकूतय्त छगू ज्याझ्वःया दथुइ औपचारिक विदाइ याःगु खः ।

निगूगु डिभिजन अर्न्तगतया स्वंगु सहायक शिविर व मुख्यालयलय् यानाः अनमिनं अयोग्य प्रमाणित याःपिं ३७१ लडाकूत मध्ये १७१ लडाकूत थ्वस्वयां न्ह्यः हे शिवर त्वःते धुंकूगु दु । बिहीवाः शिविर त्वःतुपिं २०१ लडाकूत मध्ये १४२ मिजः व ५९ मिसाः दुसाः ४६ लडाकूत झिंखुदँ क्वयेयापिं दु ।

शिविर त्वःतुपिं लडाकूत न्यागः सार्वजनिक बस पाखें थःथःगु छेँ वंगु खः । उमित यात्रा खर्च बापत अनमिनं न्यद्वं निसें झिद्वं तकाः ब्यूगु खसाः माओवादीं थीथी स्रोतं मुंकूगु झिंनिद्वं नं उमित उगु इलय् लःल्हाःगु खः । नापं उमित वसः, लाकां लगायतया सामान नं अनमिनं उपलब्ध याकूगु खः ।

लडाकू बहिर्गमन प्रकृया सिन्धुली, चितवन, नवलपरासी, इमाल, सुर्खेत जुयाः पीन्हस लिपाः रोल्पाय् थ्यंकाः क्वचाइगु ज्याझ्वः दु ।