संघीयताया विरोधय् बन्द याः वइपिनि विरुद्ध

संविधानसभाया चुनावय् हे संघीयता विरोधी नारा बियाः न्ह्यःने वःगु राष्ट्रिय जनमोर्चां आः संघीयताया विरोधय् धकाः धमाधम थीथी जिल्ला व अञ्चल बन्द याना वयाच्वंगु दु। संघीयताया विरोधय् उमिसं म्हिगः नारायणी अञ्चल बन्द याःगु खःसा २६ गते स्वनिगः व बागमति अञ्चल बन्द यायेगु धकाः ज्याझ्वः दयेका तःगु दु। उमिसं याइगु २६ गतेया ज्याझ्वःयात नेवाः स्वायत्त राज्यया पक्षधर स्वनिगःया जनतां प्रतिकार यायेगु धकाः तयारी शुरु याःगु दु। उकिं यदि थ्व पुचलं २६ गतेया ज्याझ्वः लित मकाल धाःसा वकुन्हु उमिगु बन्द विफल जुइगु जक मखु थनया स्थानीय जनतालिसे उमिगु मुठभेद समेत जुइगु खतरा दु। दँ दँ तकया संघर्ष लिपा स्वनिगःया जनतां तया वयाच्वंगु संघीय प्रणालीया आज्जुइ थ्यनी थे थ्यंकाः थ्व हे स्वनिगलय् वयाः स्वनिगःया हे जनताया आज्जुया अःखः सुनां नं बन्द थेंज्याःगु ज्याझ्वः याः वल धाःसा उकियात प्रतिकार याये मालीगु स्वाभाविक नं खः। थ्व प्रतिकार धइगु बन्दया आयोजकयात याःगु प्रतिकार जक मखु थःगु मुद्दायात संरक्षण यायेत ल्ह्वंगु पलाः नं खः। थुकी नेवाः जनता जक मखु संघीय प्रणालीया पक्षधर सकलें जनजाति छप्पँ जुयाः न्ह्यायेमाःगु अतिकं आवश्यक दु ।

जनमोर्चां संघीयताया विरोध याःगुलिं संविधानसभाय् छगू जक सीट त्याकूगु खःसां आः चुनाव लिपा वयाः धाःसा थीथी तःधंगु पार्टीया ब्राह्मणवादी नेता कार्यकर्ता नापं ब्राह्मणवादीतय् ल्हातय् लानाच्वंगु तःधंगु सञ्चार माध्यमतय्सं नं उमित साथ बियाच्वंगु दु। जनमोर्चाया विरोध यायेबलय् वयागु लिउने सक्रिय जुयाच्वंगु थ्व तत्वयात नं ल्वःमंके मजिउ ।

More Stories Like this