'संघीयता विरुद्ध कांग्रेस-एमाले हे परिचालित'
येँ (सन्ध्या टाइम्स)/मधेशी जनअधिकार फोरमया केन्द्रीय दुजः नापं केन्द्रीय प्रचार प्रसार विभाग प्रमुख सभासद् वीपी यादवं आःया अवस्थाय् जनमोर्चा नेपालया नामं संघीयता विरुद्ध आन्दोलन यानाच्वंगु जूसां उगु आन्दोलनया लिउने च्वनाः सरकारया नेतृत्व यानाच्वंगु नेकपा (एमाले) व नेपाली कांग्रेसया कार्यकर्तात हे परिचालित जुयाच्वंगु द्वपं बियादीगु दु ।
थौं सुथय् 'सन्ध्या टाइम्स' लिसे खँ ल्हासें वय्कलं संघीयता विरुद्ध धाःगु उगु आन्दोलनय् वनेत राष्ट्रिय जनमोर्चाया कार्यकर्तात यक्व मदुगुलिं कांग्रेस व एमालेया नेतातय्सं दुनें दुने थः कार्यकर्तात परिचालन यानाच्वंगु दु धयादिल ।
वय्कलं आःया ल्वापु धइगु संघीयताया पक्ष व संघीयताया विपक्ष दथुइ जुयाच्वंगु दु धासें सरकारं हे संघीयता विरुद्ध आन्दोलन यानाच्वंपिंत ग्वाकेगु नापं ग्वाहालि यानाच्वंगु दु धासें उकिं थ्व सरकार हे संघीयता विरोधी खः धकाः नं धयादिल ।
उपप्रधानमन्त्री सुजाता कोइरालां संघीयता व मधेश प्रदेशया विरुद्ध सार्वजनिक रुपं न्ववायेगु यानाहःगु हे थ्व सरकार संघीयता विरुद्ध वनाच्वंगुया दसि खः धकाः नं वय्कलं दावी यानादिल। आः संघीयताया निंतिं थःपिंसं थीथी जातीय खलः पुचः नापं राजनीतिक पार्टीतलिसे नं जानाः आन्दोलन यायेगु जुइ जानकारी नं भाजु यादवं बियादिल। संघीयता विरुद्धया आन्दोलनयात प्रतिकार यायेत थःपिनि कार्यकर्तात तयार दुगु खँ नं वय्कलं धयादीगु दु ।
लुमंकेबहः जू, राष्ट्रिय जनमोर्चां संघीयता विरुद्ध आन्दोलन धकाः म्हिगः नारायणी अञ्चल बन्द याःगु इलय् बारा जिल्लाया थीथी थासय् स्थानीय मनूतय्सं बन्द विरुद्ध प्रर्दशन यानाः उकिया प्रतिकार याःगु खः ।
