नीतुया मानव अधिकार हनन्
येँ (सन्ध्या टाइम्स)/पुलांम्ह सभासद् अमरेशकुमार सिंहया कलाः नीतु सिंहयात भारतं छुं हे प्रमाण मदयेक 'भारतया लागिं खतरनाक मनू' धकाः पितिना हःगु खँयात कयाः नेपाःया थीथी मानव अधिकारवादी व मिसावादी संघ संस्थातय्सं विरोध यानाहःगु दु ।
भारतय् आखः ब्वनाच्वंम्ह छम्ह निर्दोष नेपाःमियात अज्याःगु द्वपं बीगु वयागु मानव अधिकारया हनन् खः धासें थुकिं सदियौं पुलांगु नेपाः-भारतया सामाजिक, सांस्कृतिक व राजनीतिक स्वापूयात तकं बांमलाःगु लिच्वः लाका बीगु खँ थ्व संस्थातय्सं धाःगु दु ।
थ्वहे झ्वलय् मय्जु नीतु सिंहयात भारतं थःगु देशया लागिं खतरनाक मनू धकाः देश निकाला याना हःसां वय्कःलिसे सम्बन्धित अज्याःगु छुं नं सूचना भारत सरकारयाके मदुगु खँ भारतीय गृह मन्त्री पी. चिदाम्बरमं धयादीगु दु ।
