स्वन्हु लिपा नेप्से सामान्य अंकं च्वय्
येँ (सन्ध्या टाइम्स)/नेपाल स्टक एक्सचेन्जय् थ्व वालय् लगातार स्वन्हुयंकं कुहां वंगु बजार परिसुचक नेप्से म्हिगः धाःसा थहां वंगु दु। मंगलवाः तकया दुने करीब १३ अंकं कुहां वंगु नेप्से परिसुचक म्हिगःया कारोबारं थहां वंसां तसकं सामान्य अंकं जक थहां वंगु दु। थ्व वाःया स्वन्हुया दुने नेप्से लगायतया कारोबार समुहया सुचक कुहां वःगु खः।
म्हिगःया कारोबारय् नेप्से शुन्य दशमलव ४५ या सामान्य अंकं थहां वनाः ५३६ दशमलव ६३ अंकय् थ्यंगु दु। अथे हे सेन्सेटिभ नं शुन्य दशमलव २५ या सामान्य अंकं थहां वंगु दुसा फ्लोट इन्डेक्स शुन्य दशमलव शुन्य ३ अंकं कुहां वल। स्टक एक्सचेन्जय् म्हिगः नं शेयर कारोबार शुरु जुइवं हे नेप्से नं कुहां वनेगु क्रमं गति काःगु खः। मेमेगु दिंया कारोबारय् थें हे म्हिगःया कारोबारय् नं नेप्से असामान्य ढंगं थहांकुहां जुया हे च्वंगु खःसा बजाः बन्द जुइ छुं ई न्ह्यः बजार परिसुचक थहां वंगु खः ।
स्टक एक्सचेन्जया कथं म्हिगःया कारोबारय् वाणिज्य समुहया कारोबारय् वःगु सुधारं नेप्से नं थहां वनेगुली सकारात्मक लिच्वः लाकूगु खः। कारोबार जूगु उपसमुहय् वाणिज्य समुह छगू जक २ दशमलव शुन्य ४ अंकं थहां वनाः ५१४ दशमलव शुन्य ३ अंकय् थ्यंगु दु ।
मेखे कुहां वःगु उपसुचकय् विकास बैंक समुहया सुचक २ दशमलव ४९ अंकं कुहां वयाः ५९० दशमलव २८ अंकय् थ्यंगु दु। दकलय् मध्ये अप्वः जलविद्युत समुहया सुचक म्हिगः छन्हुया दुने १९० अंकं कुशां वयेवं ७८४ दशमलव ३२ अंकय् थ्यंगु दु। फाइनान्स समुह शुन्य दशमलव १३ अंकं कुहां वनाः ५४२ दशमलव ३ अंकय् थ्यंगु दु। वीमा समुहया सुचक नं शुन्य दशमलव ३१ अंकं कुहां वयाः ५७३ दशमलव ४९ अंकय् थ्यंगु दु ।
बजार परिसुचक थहां वंसां कारोबार धाःसा अझं थहां वने फयाच्वंगु मदुनि। म्हिगः न्यय्स्वंगू कम्पनीया न्यय्निद्वः व च्यासः व ग्वीन्हय्गू कित्ता शेयर न्याये-मी जुयाः निगू करोड पीगुंगू लख नीप्यद्वः तका दांया कारोबार जुल। दांया ल्याखं थुगु कारोबार वंगु छुं दिं थुखेया आः तकया हे दकलय् म्हो कारोबार खः। म्हिगःया कारोबारय् झिंगुंगू कम्पनीया शेयर भाः थहां वंगु दुसा नीच्यागू कम्पनीया शेयर भाः कुहां वंगु व न्हय्गू कम्पनीया शेयर भाः यथावत कायम जूगु स्टक एक्सचेन्जं जानकारी बिउगु दु ।
भिवोर विकास बैंक दांया ल्याखं दकलय् अप्वः पीछगू लाख न्नय्छद्वः तका दांया कारोबार याःगु दु। पोखरा फाइनान्स कम्पनीं दकलय् अप्वः लबः कायेत ताःलाःगु दुसा एभरेष्ट बैंक लिमिटेडं दकलय् अप्वः द्यापं फःगु दु ।
