फोरमपाखें आन्दोलनया ज्याझ्वः सार्वजनिक
मधेशी जनअधिकार फोरमं मधेश व मधेशीया समयस्या प्रति सरकार गम्भीर मजूगु धासें बिहीवाः आन्दोलनया ज्याझ्वः सार्वजनीक याःगु दु ।
पार्टी ज्याकू बालकुमारीलय् बिहीवाः पत्रकार सम्मेलन यानाः पार्टी महासचिव रामसहाय यादवं प्रचार प्रसार, धर्ना, जुलुस थंज्याःगु ज्याझ्वः सार्वजनिक यानादीगु दु । फोरमं माघ २ गते निसें न्हापांगु चरणया आन्दोलन यायेगु ज्याझ्वः क्वछिउगु दु ।
सार्वजनिक याःगु ज्याझ्वः कथं २ गते प्रचारप्रसार, ३ गते दक्वं जिल्ला प्रसासन ज्याकूथीइ जुलुस सहित प्रमुख जिल्ला अधिकारी मार्फत प्रधानमन्त्रीयात ज्ञापनपत्र लःल्हायेगु, ५ गते मधेशी सहिदप्रति श्रद्धान्जली अर्पण, ७ गते सरकार विरुद्ध जिल्ला सदरमुकामय् जुलुस प्रदर्शन, ९ गते रौतहटय् विरोध सभा, ११ गते जिल्ला सदरमुकामय् मसाल जुलुस पिकायेगु ज्याझ्वः दु ।
अथेहे माघ १४ गते जिल्ला प्रसाशन ज्याकू न्ह्यने झिताः इलं निसें निघौ तक धर्ना बीगु, १५ गते सर्लाहीलय् विरोध सभा, १६ गते सप्तरी व कैलालीलय् विरोध सभा, १७ गते सरकार विरुद्ध हाकूगु ध्वाँय् क्यनेगु व २० गते जुलुस प्रदर्शन लिपाः विरोध सभाया ग्वसाःग्वयेगु खं फोरमं धाःगु दु ।
पत्रकार सम्मेलनय् फोरम अध्यक्ष उपेन्द्र यादवं नीनिगू बुँदे सहमति कार्यान्वयनय् सरकार असक्षम जूगुलिं आन्दोलन यायेत थःपिं बाध्य जूगु धयादिल । वयेकलं न्हापांगु चरणया आन्दोलन सरकारयात ख्याच्वः बीगु कथं जक हयाःगु धयादिसें सरकार अझ नं गम्भीर मजुसाः हानं निगूगु चरणया आन्दोलन यायेत बाध्य जुइगु धयादिल ।
