चःमति नेवाः खलःया थीथी ज्याझ्वः
येँ (सन्ध्या टाइम्स)/चःमति नेवाः खलःया ग्वसालय् आः नकतिनि थीथी ज्याझ्वः जुल ।
खलःया ग्वसालय् थुगुसीया न्हूदँ नेपाल संवत् ११३० या लसताय् जूगु येँ-वटार-त्रिशुली मोटर-साइकल र्यालीया समापन, ०६५ सालया एस.एल.सी परीक्षाय् ताःलाःपिंत हनेज्या व खलःपाखें चायेकातःगु चःमति बहुउद्देश्यीय सहकारी संस्था लि.या स्वक्वःगु वार्षिक साधारण सभा जूगु खः ।
उगु ज्याझ्वलय् मूपाहां कथं अर्थमन्त्री सुरेन्द्र पाण्डे झायादीगु खःसा पाहां कथं मोहनकृष्ण डंगोल, उत्तर रेग्मी, जीवनराम श्रेष्ठया लिसें येँ देय्या पलांपिं कुमारी माजुपिं बिज्याःगु खः।
खलःया नायः पूर्णकाजी ज्यापूया सभापतित्वय् जूगु ज्याझ्वः राजेन्द्र श्रेष्ठया लसकुस न्वचुपाखें न्ह्याःगु खःसा ज्याझ्वः लिपा सांस्कृतिक ज्याझ्वः नं न्ह्यब्वःगु खः ।
