शीर्ष नेतातय् न्ह्यःने खुगू बुँदा
येँ (सन्ध्या टाइम्स्)/ताः ई न्ह्यवं निसें च्वने मफयाच्वंगु स्वंगू दलया शीर्ष नेतातय्गु मुँज्या थौं नेपाली कांग्रेसया सभापति गिरिजाप्रसाद कोइरालाया छेँय् च्वनीगु जूगु दु।
थौं ४ बजे माओवादी अध्यक्ष प्रचण्ड, नेकां सभापति कोइराला नापं एमाले अध्यक्ष झलनाथ खनालया उपस्थितिइ स्वंगुलिं पार्टीया मेमेपिं नेतातय्गु बैठक च्वनेत्यंगु खः ।
थौंया शीर्ष नेतातय्गु मुँज्याय् सहलह यानाः निर्णय पिकायेत खुगू बुँदा तयार यानातःगु दु ।
न्हापा हे सार्वजनिक यायेधुंकूगु उगु खुगू बुँदाय् १) माओवादीलिसे जूगु १२ बुँदे समझदारींनिसें आः तकया समग्र समिक्षा यायेगु, २) दलतय् दथुइ विश्वासया लकस ब्वलंकेगु, ३) राष्ट्रपतिया पलाखं ब्वलनावःगु विवाद समाधान यायेगु, ४) माओवादीया सेना समायोजन, ब्यवस्थापन व पुनःस्थापना यायेगु नापं शान्ति प्रक्रियानाप स्वाःगु खँय् सहमति ब्वलंकेगु, ५) जेष्ठ १४ गतेया दुने न्हूगु संविधान दयेकेगु निंतिं ब्वलनाच्वंगु विवाद समाधान यायेगु, व ६) शान्ति सम्झौताया प्रतिबद्धता कार्यान्वयन यायेगु निंतिं 'पावर शेयरिङ' यायेगु विषय दुथ्यानाच्वंगु दु ।
