वीर अस्पताल थनिंनिसें चालीगु
येँ (सन्ध्या टाइम्स)/ चिकित्सक आन्दोलनं ठप्प जुयाच्वंगु नेपाःया हे दकलय् पुलांगु वीर अस्पताल सुचारु यायेत सरकारं नीस्वंगु कार्यदल व आन्दोलनरत पक्ष दथुइ थौं वार्ता जुइगु जूगु दु ।
वीर अस्पतालया समस्या समाधान यायेगु निंतिं प्रधानमन्त्री माधव नेपालं तप्यंक हे निर्देशन बियादी कथं कार्यदल दयेकेत स्वास्थ्य मन्त्री उमाकान्त चौधरीं म्हिगः हे चिकित्सा अध्ययन राष्ट्रिय प्रतिष्ठान वीर अस्पतालया पदाधिकारितय्त सःताः सहलह ब्याकादीगु खः ।
अस्पतालया समस्यायात कयाः सहलह ब्याके धुनेवं हे चकित्सा अध्ययन राष्ट्रिय प्रतिष्ठान वीर अस्पतालया रजिष्ट्रार डा. विश्वराज जोशीं राजीनामा बियादीगु खः। वीर अस्पतालया समस्या समाधानया निंतिं सरकारं हे हस्तक्षप यानाः थ्व वार्ता यायेत्यंगु खः। थौं वार्ता शुरु जूगुलिं बन्द जुयाच्वंगु वीर अस्पताल नं थनिंनिसें हे चालीगु खँ चिकित्सकतय्सं धाःगु दु ।
