माओवादीया प्यम्ह नेताया प्यता हे खँ
येँ (सन्ध्या टाइम्स)/एनेकपा (माओवादी) या प्यम्ह वरिष्ठ नेतातय्गु खँ प्यखे हे स्वःगु दुसा मुँज्याय् छझाः कचमच तकं जूगु दु। म्हिगः क्वचाःगु केन्द्रीय कमिटीया मुँज्याय् माओवादीया नायः प्रचण्ड, वरिष्ठ न्वकुपिं मोहन बैद्य किरण, डा. बाबुराम भट्टराई व नारायणकाजी श्रेष्ठ प्रकाशया खँ प्यखे हे स्वयाः कचमच जूगु खनाः केन्द्रीय दुजःत हे अजूचाःगु खँ सूत्रं धाःगु दु ।
मुँज्याय् डा. भट्टराईनं थःतः भारतया दलालया रुपय् न्ह्यब्वयाः थःगु चरित्रहत्या यायेत स्वल, थ्व छु खः? धकाः न्ह्यसः तयादीगु खःसा पार्टी अध्यक्ष प्रचण्डं भट्टराईयात भारतया दलाल धयागु मदु, भारतया छुं लबीं थःत व मेगु लबीं भट्टराईयात प्रधानमन्त्री दयेकेमाः धकाः प्रस्ताव हयाच्वन जक धयागु खः, मेगु खँ फागुनया न्हापांगु वालय् जुइगु केन्द्रीय कमिटीया विस्तारित मुँज्याय् सहलह यायेगु जुइ धयादिल। पार्टीया आकस्मिक मुँज्या धकाः सःतूसां नं प्यम्ह नेतातय्सं जक न्ववानाः छगू कथं प्रशिक्षण बी थें यानाः क्वचायेकूगु उगु मुँज्याय् मोहन बैद्यं पार्टीया नायः व न्वकु भट्टराईया थ्व कचमच छु खः स्पष्ट यायेमाल धकाः धयादीगु खः ।
माओवादीया छम्ह केन्द्रीय नेतां 'सन्ध्या टाइम्स'यात धयादी कथं उगु मुँज्याय् मेम्ह नेता प्रकाशं थ्व इलय् सरकारया नेतृत्व यायेगु जुल धाःसा पार्टीया नं नेतृत्व यानाच्वंम्ह नायः प्रचण्ड बाहेक मेपिं प्रधानमन्त्री जुइ मजिउ नापं मेपिन्त स्वीकार नं याये फइ मखु धयादीगु खः ।
माओवादी नेतातय्गु खँ न्यनाः थ्व इलय् खुसि सिथय् च्वनाः सु माझी जुइगु धइथें जक खँ जुल धकाः टिप्पणी यानाहःगु दु ।
