हिमालया च्वापु नायावःगु खँ अस्वीकार

येँ (सन्ध्या टाइम्स)/ग्लोबल वार्मिङ्गया लिच्वः कथं हिमालयया च्वापु अप्वः नायाः तःधंगु विनास वइन धकाः नेपाः थेंज्याःगु देशं चिउताः प्वंकाच्वंगु इलय् भारतया वातावरण मन्त्रालयं धाःसा हिमालयया च्वापु न्हापा स्वयां अप्वः नाया वःगु विषययात पत्याः याये मफइगु खँ धकाः बिचाः पित बिउगु दु ।

छुं ई न्ह्यः भारतया न्हूदिल्लीइ जूगु छगू ज्याझ्वलय् न्ववासें अनया वातावरण मन्त्री जयराम रमेशं थज्याःगु बिचाः न्ह्यःने तयादीगु खः। भारतया वैज्ञानिकतय्सं नं भारतीय भूमिइ लाःगु हिमालयया च्वापु असामान्य ढंगं नाया वयाच्वंगु दु धकाः रिपोर्ट बिउगु खःसा मन्त्री रमेशं वैज्ञानिकतय् उगु रिपोर्टयात हे हाथ्या बिसें हिमालयया च्वापु नाया वयाच्वन धइगु खँ पुष्टि जुइगु प्रशस्त आधार मदु धयादीगु खः। वैज्ञानिकतय् अज्याःगु रिपोर्टया विरुद्ध वय्कलं मेगु रिपोर्ट पेश यासें हिमालया च्वापु नाया वयाच्वन धइगु खँयात हे हाथ्या बियादीगु खः ।

हिमालयया च्वापु नाया वयाच्वंगु बारे सरकारया आधिकारिक धापू न्ह्यब्वसें वय्कलं धयादिल, 'च्वापु नाया वयाच्वंगु थ्व घटनायात असामान्य धकाः झीसं धाये फइ मखु छाय्धाःसां आः तक झीसं सामान्य छु खः धकाः हे मसिउनि ।'

हिमालयया च्वापु नायाच्वन धइगु खँ पूर्ण रुपं हे विदेशी अनुसन्धान पुचःतय्सं बिउगु रिपोर्टय् आधारित खः धासें वय्कलं आः थःपिं थज्याःगु औपनिवेशवादी चिन्तनं पिहां वयेमाः धकाः नं धयादिल। वय्कलं धयादिल, 'आः झी थज्याःगु विदेशी रिपोर्टं पिहां वयाः झीगु थःगु हे जनजातिया अध्ययनं धाःगु खँयात पत्याः यायेगुपाखे वनेमाः ।'

वय्कलं पृथ्वीया ध्रुवीय लागाय् लाःगु अन्टार्काटिकाया च्वापु नाया वयाच्वंगु विषययात हिमालयया च्वापु नाया वयाच्वंगु विषययालिसे स्वायेगु 'अन्तर्राष्ट्रिय गल्ती' जुइगु बिचाः नं प्वंकादिल। धयादी, 'थ्व निगू विश्वया निगू अलग अलग हे थासय् लानाच्वंगु वस्तुत खः ।'

दक्षिण एशियाया फुक्क हे खुसिइ च्वापुपाखें वइगु लःया योगदान १० प्रतिशत जक दु, बाँकी लः वापाखें हे दइगु जूगुलिं छुं जुयाः च्वापु नाया हे वःगु खःसां खास हे लिच्वः लाइ मखु धइगु नं भारतया तर्क दु ।