'थ्री इडियट्स' स्वयाः मचापाखें आत्महत्या
येँ (सन्ध्या टाइम्स)/भारतय् हिट जुयाच्वंगु हिन्दी फिल्म 'थ्री इडियट्स' स्वयाः मुम्बईया छम्ह मचां स्कूलय् हे आत्महत्या याःगु दु। १२ दँ दुम्ह सुशान्त एकनाथ पाटिलं अनया दादर्स शरदआश्रम स्कूलया चःबिइ वंगु सोमवाः आत्महत्या याःगु खः ।
आः तकया अनुसन्धानं सीदु कथं सुशान्तं आइतवाः सनिलय् 'थ्री इडियट्स' फिल्म स्वःगु व लिपा उकिं हे प्रभावित जुयाः सोमवाः स्कूलय् वयाः आत्महत्या याःगु खः। आः नकतिनि जूगु स्कूलया जाँचय् सुशान्त न्हय्गू मध्ये प्यंगू विषयय् फेल जूगु खः ।
सोमवाः स्कूलय् वयाः थःगु ब्याग क्लास रुमय् तसें प्रार्थना जुइ सिबें न्ह्यः सुशान्त पिसाब याये धकाः चःबिइ वंगु जुयाच्वन। तर न्हापांगु पिरियड सिधयां नं व मवसेंलि पासापिंसं चःबिइ स्वःवंबलय् वयात यगानाच्वंगु अवस्थाय् लुइकूगु खः। वं यगायेत खिपः नं छेँनं हे ज्वना वःगु जुयाच्वन ।
घटना लिपा स्कूलं तुरुन्त हे मेपिं नं रिजल्ट बांमलाःपिं मस्तय् मांबौयात सःताः थः मस्तय्त बांलाक ध्यान बीत इनाप याःगु खः ।
थ्व स्वयां न्ह्यः शनिवाः तिनि मुम्बईया हे दोम्बीवाली धाःगु थासय् च्वंम्ह ११ दँ दुम्ह छम्ह मिसा मचां थःगु हे छेँय् यगानाः आत्महत्या याःगु खः। मुम्बईलय् थथे हे मेम्ह छम्ह मचां नं आत्महत्या याःगु खः ।
मस्तय्सं आत्महत्या याइगु थज्याःगु घटना लगातार जुइवं स्थानीय अभिभावकपिं आः थःपिं हे स्कूल वनाः मस्त काः वनेगु अप्वयाच्वंगु दु ।
